Найбуйнейшы банк Турцыі стаў масава адмаўляць расейцам у адкрыцці рахункаў

Нават з наяўнасцю ВНЖ і турэцкай прапіскі.

Турэцкі банк DenizBank, які з'яўляецца адной з самых буйных крэдытных арганізацый у краіне, з пачатку 2024 года практычна перастаў адкрываць рахункі грамадзянам Расеі, піша РБК са спасылкай на двух пасярэднікаў, якія дапамагаюць расейцам атрымліваць карты ў банках Турцыі.

«З дзесяці заявак на адкрыццё рахунку ўхваленне атрымлівае толькі адна. Рахунак немагчыма адкрыць нават з наяўнасцю ВНЖ і прапіскі ў Турцыі», – апісаў сітуацыю адзін з пасярэднікаў Сяргей Аўсяннікаў. Ён дадаў, што цяпер DenizBank робіць выключэнні толькі кліентам з вялікім дэпазітам ад $100 тыс. і больш.

Праблему пацвердзіў кіроўны партнёр Lenar Wealth Management Ленар Рахманаў, які працуе ў Стамбуле. Паводле ягоных словаў, на верагоднасць адкрыцця рахунку расейцу ўплывае «калібр кліента» і асабістыя дамоўленасці з канкрэтным аддзяленнем банка.

Наяўнасць ВНЖ і мясцовай прапіскі не гарантуе адкрыццё рахунку ў DenizBank, пацвярджае іншая пасярэдніца Алена Чарнышова. Яна адзначае, што расейскім грамадзянам, маючы на руках поўны пакет неабходных дакументаў, будзе прасцей звярнуцца ў іншы банк для гэтых мэтаў.

У канцы мінулага года прэзідэнт ЗША Джо Байдэн падпісаў указ, які прадугледжвае ўвядзенне абмежаванняў супраць замежных банкаў за дапамогу расейскім фізічным і юрыдычным асобам у абыходзе санкцый і за спрыянне ў пастаўках для расейскага АПК. Пасля гэтага шэраг замежных крэдытных арганізацый узмацніў жорсткасць умоваў абслугоўвання расейцаў, таксама ў грамадзянаў РФ пачаліся складанасці з правядзеннем плацяжоў і пераводаў.

Пасля поўнамаштабнага ўварвання Расеі ва Украіну і санкцый, якія рушылі за гэтым, некаторыя краіны, уключаючы Турцыю, сталі дапамагаць Маскве рээкспартаваць тавары. Паводле звестак дасведчаных крыніцаў Financial Times, расейскія спецслужбы выдаткавалі «значныя намаганні і час», каб знайсці спосабы абыходу санкцый і захадаў экспартнага кантролю, і ў такіх аперацыях «наўмысна або ненаўмысна» пачалі ўдзельнічаць фінансавыя пасярэднікі.

Партнёрка калегіі адвакатаў Pen & Paper Кіра Вінакурава мяркуе, што адмовы ў адкрыцці рахункаў выкліканыя рызыкамі для банкаў патрапіць пад санкцыі, паколькі доступ расейскіх асобаў да сусветнай фінансавай сістэмы могуць расцаніць як унёсак у фінансавы сектар Расеі. Акрамя таго, вырастае рызыка ўвядзення абмежавальных захадаў за спрыянне ў абыходзе антырасейскіх санкцый.

«Адкрываючы рахунак расейскім асобам, турэцкім банкам даводзіцца выдаткоўваць дадатковыя рэсурсы на праверку транзакцый з гледзішча ўдзелу падсанкцыйных асобаў або ажыццяўлення забароненай з гледзішча заходніх санкцый дзейнасці», – кажа Вінакурава, адзначаючы, што Расея цяпер з'яўляецца «юрысдыкцыяй з падвышанай санкцыйнай рызыкай».

Патрабаванні ў абслугоўванні расейцаў з боку турэцкіх банкаў надалей будуць толькі ўзмацняцца жорсткасць праз рост санкцыйнага ціску, але цалкам адмовіцца ад новых кліентаў-расейцаў банкі Турцыі наўрад ці наважацца, упэўненая юрыстка: «Адным з прынцыпаў санкцыйных рэжымаў заходніх юрысдыкцый з'яўляецца накіраванасць захадаў на канкрэтных асобаў, сектары, тавары ці паслугі, і поўная адмова ад абслугоўвання расейцаў наўрад ці будзе імі заахвочвацца».

У траўні летась намеснік старшыні Банка Расеі Аляксей Гузнаў паведаміў пра праблемы, з якімі сутыкаюцца расейскія банкі пры спробах адкрыць рахункі ў «сяброўскіх» краінах, каб наладзіць гандаль у абыход даляра, еўра ды іншых сусветных валютаў. Перад гэтым у ЦБ РФ расказалі, што замежныя банкі не адказваюць расейскім калегам на прапановы партнёрства, а старшыня думскага камітэта ў фінансавым рынку Анатоль Аксакаў заявіў, што толькі тры крэдытныя арганізацыі здолелі адкрыць карэспандэнцкія рахункі.