«Белгазпрамбанк» заблакаваў свае крэдыткі ў ЗША
6- 29.05.2012, 9:42
«Белгазпрамбанк» з 1 чэрвеня ўводзіць абмежаванне на выкарыстанне эмітаваных банкам пластыкавых картак на тэрыторыі ЗША «з мэтай мінімізацыі рызык здзяйснення махлярскіх аперацый».
«Дадзеная мера абумоўленая адсутнасцю падтрымкі абслугоўвання картак з мікрачыпам прадпрыемствамі гандлю і сэрвісу ў ЗША, што не забяспечвае дастатковую абарону ад прыёму падробленых, а таксама выкрадзеных альбо згубленых картак», - гаворыцца ў паведамленні, апублікаваным на сайце банка.
Разам з тым, абмежаванне не распаўсюджваецца на аперацыі, што выконваюцца праз зарэгістраваныя ў ЗША інтэрнэт-крамы.
«Абмежаванне ўсталёўваецца толькі ў дачыненні да аперацый, што ажыццяўляюцца з фізічным прысутнасцю пластыкавай карткі ў прыладах (напрыклад, зняцце наяўных у банкамаце, аплата тавараў і паслуг у плацежным тэрмінале), фізічна размешчаных на тэрыторыі ЗША», - удакладняе банк.
У выпадку неабходнасці кліент банка можа разблакаваць сваю картку на час паездкі ў ЗША, напісаўшы адпаведную заяву з указаннем тэрміну паездкі.