Літоўскі дэпутат: Сорамна за забарону ўезду беларускім праціўнікам АЭС
4- 27.09.2012, 15:29
Дэпутат Сейма Літвы Казімірас Уока раскрытыкаваў рашэнне аб ануляванні віз Мікалаю Уласевічу і Таццяне Новікавай.
26 верасня беларускія грамадскія актывісты накіроўваліся ў Вільню на канфэрэнцыю па ядзернай бяспеке. Літоўскія памежнікі адмовіліся ўпускаць іх у краіну, нагадвае «Радыё Свабода».
«Дзесьці сем-восем месяцаў назад мы, апаненты будаўніцтва ядзерных электрастанцый з Літвы, Калінінградскай вобласці і Беларусі, пачалі размаўляць паміж сабой і дамовіліся збіраць подпісы пад узгодненым тэкстам, у якім было патрабаванне спыніць будаўніцтва ў кожнай краіне і правесці рэферэндум з гэтай нагоды . У Літве гэта атрымалася, у нас у Сейме было галасаванне з нагоды рэферэндуму і 14 кастрычніка такі рэферэндум адбудзецца. У Беларусі і ў Калінінградскай вобласці збор подпісаў працягваецца», - кажа Казіміраса Уока.
Мікалай Уласевіч і Таццяна Новікава збіраліся прыехаць на канферэнцыю з нагоды атамных электрастанцый у Сейме. Але іх уключылі ў спіс непажаданых асоб у Літве.
«Самае смешнае ў тым, што канферэнцыю арганізавала моладзь кіруючай партыі ў Літве. Гэта значыць, людзей не пусцілі на канферэнцыю кіруючай партыі.
Улада, якая вельмі хоча пабудаваць гэтую атамную станцыю, моцна нервуецца і прымае, я сказаў бы, такія тупыя рашэнні. За гэта тупое рашэнне мне, як літоўскаму дэпутату, сорамна», - сказаў ён.