Сябра Лукашэнкі дапытвалі тры гадзіны

Былы прэм'ер-міністр Італіі Сільвіо Берлусконі даваў паказанні па справе сенатара, які падазраецца ў дапамаганні мафіёзнай дзейнасці.

Допыт, які праводзілі следчыя з горада Палерма, адбыўся ў сераду ўвечары ў Рыме, паведамляе «Корреспондент».

Сенатар Марчэла Дэл'Утры, які з'яўляецца адным з бліжэйшых паплечнікаў і даўніх сяброў Сільвіо Берлусконі, праходзіць падазраваным па справе аб дапамаганні мафіёзнай дзейнасці, якую вядзе пракуратура Палерма. Як адзначаецца ў паведамленні, сам экс-прэм'ер з'яўляецца толькі сведкай па гэтай справе.

Раней у мясцовых СМІ з'явіліся паведамленні аб тым, што Дэл'Утры вымагаў грошы ў экс-прэм'ера. Сенатара, з імем якога звязана некалькі скандальных судовых працэсаў, называлі «пасрэднікам» паміж Берлусконі і «Коза ностра», калі ў 1970-1980-х гадах той выплочваў мафіі «значныя сумы» грошай за тое, каб мець магчымасць весці прадпрымальніцкую дзейнасць на Сіцыліі .

У сакавіку гэтага года Берлусконі перавёў на рахунак жонкі Дэл'Утры 15 мільёнаў еўра, з якіх 11 мільёнаў адразу ж былі пераведзены на рахунак аднаго з банкаў Дамініканскай рэспублікі. Усяго ж за апошнія 12 гадоў Берлусконі пералічыў Дэл'Утры каля 40 мільёнаў еўра.

Паводле афіцыйнай версіі, банкаўскі перавод, праведзены Берлусконі напярэдадні вынясення Касацыйным судом рашэння ў дачыненні да Дэл'Утры, які пастанавіў перагледзець справу сенатара ў апеляцыйным судзе, быў зроблены ў рамках здзелкі куплі-продажу вілы на возеры Кома.

Аднак следчыя мяркуюць, што ён быў зроблены па іншых прычынах, якія яны маюць намер устанавіць. Для гэтага пракуратура Палерма раней ужо неаднаразова выклікала Берлусконі для дачы паказанняў, аднак палітык ігнараваў гэтыя запрашэнні. Акрамя таго, у канцы ліпеня па справе Дэл'Утры была дапытаная ў якасці сведкі старэйшая дачка Берлусконі Марына, якая давала паказанні на працягу двух гадзін.

Сам скандальны сенатар назваў чарговы суд у адносінах да сябе «палітычным працэсам», які закранае і Берлусконі, таму што той вырашыў вярнуцца на палітычнае поле.

Нагадаем, 13 ліпеня паведамлялася, што партыя Сільвіо Берлусконі Народ свабоды (НС) будзе вылучаць кандыдатуру свайго лідэра ў якасці кандыдата на пасаду прэм'ер-міністра Італіі пасля чарговых парламенцкіх выбараў, якія адбудуцца на Апенінах ў 2013 годзе.