Падатак на аўто ўдарыць і па прыватніках, і па бізнесе

Прапанова Мінфіна выклікала буру абурэнняў ва ўладальнікаў транспартных сродкаў.

Людзі з жыццёвым вопытам правялі паралелі з транспартным падаткам, які існаваў калісьці ў Беларусі, піша «Інтэрфакс».

Добра забытае старое?

«Яшчэ некалькі гадоў таму ўладальнік аўтамабіля, які праходзіў тэхагляд, разам з квітанцыяй за паслугі станцыі тэхабслугоўвання прадстаўляў квітанцыю аб выплаце так званага дарожнага збору, - распавёў намеснік генеральнага дырэктара Беларускай асацыяцыі міжнародных аўтамабільных перавозчыкаў (БАМАП) Генадзь Бальцэвіч. - У той час дзяржтэхагляд ажыццяўляўся раз у год, і плаціць трэба было таксама штогод. Можа, прапанаваны разавы плацёж за выдачу дазволу на ўдзел аўтамабіля ў дарожным руху і з'яўляецца завэлюмаванай заменай таго падатку?»

Дарэчы, нядаўна з прапановай увесці дарожны падатак з уладальнікаў транспартных сродкаў выступілі гарадскія ўлады Брэста. На 26-й сесіі гарадскога Савета дэпутатаў намеснік старшыні Брэсцкага гарвыканкама Мікалай Бясько паведаміў, што недарэмонты вуліц з году ў год прывялі да таго, што стан дарожнай сеткі становіцца ўсё больш крытычным. Такіх сродкаў у гарадскім бюджэце няма, таму дэпутаты ў якасці адной з мер і прапанавалі дарожны падатак.

Прыбытковасць перавозак паменшыцца

Намеснік начальніка галоўнага ўпраўлення бюджэтнай палітыкі Міністэрства фінансаў Беларусі Алег Селіверстаў, прадстаўляючы ў «парламенце» прапановы ўрада па падатковай палітыцы на 2014 год, растлумачыў, што памер новай дзяржпошліны будзе ў дыяпазоне ад 3 да 5 базавых велічынь у год. Гэта значыць па дзеючых расцэнках - ад 390 тысяч да 650 тысяч беларускіх рублёў. Разавы плацёж будзе залежаць ад вагі аўтамабіля і выплачвацца па-за залежнасці ад таго, ідзе гаворка аб легкавых або грузавых транспартных сродках.

Па словах намесніка гендырэктара БАМАП Генадзя Бальцэвіча, увядзенне новага плацяжу нічога добрага аўтамабілістам не абяцае.

«Менш за ўсё падобнае новаўвядзенне, вядома, узрадуе пенсіянераў, - лічыць ён. - Астатнім удзельнікам дарожнага руху гэта таксама будзе малапрыемна. Для міжнародных перавозчыкаў новы збор таксама стане дадатковым цяжарам. Паліва даражэе, сетка платных аўтамабільных дарог у Беларусі пашырылася - усё гэта зніжае прыбытковасць працы».

Аўтамабіль адзін - збораў некалькі

Чалавек, які набыў аўтамабіль, у нашай краіне становіцца «дойнай каровай». Яму даводзіцца аплачваць акцыз на паліва, платныя дарогі, дзяржаўны тэхнічны агляд. Цяпер дадалася плата за допуск да ўдзелу ў дарожным руху.

Прычым фактычна новая пошліна ідзе ў дадатак да тэхагляду. Бо ў квітанцыі, якую трэба аплаціць перад ТА, так і запісана: «Аплата за праверку транспартнага сродку і неабходных дакументаў з выдачай дазволу на допуск да ўдзелу ў дарожным руху».

У «Палажэнні аб парадку правядзення дзяржаўнага тэхнічнага агляду транспартных сродкаў і іх допуску да ўдзелу ў дарожным руху» таксама чорным па белым запісана: «Дзяржаўны тэхнічны агляд - сукупнасць арганізацыйна-тэхнічных мер, накіраваных на недапушчэнне да ўдзелу ў дарожным руху транспартных сродкаў, якія не адпавядаюць патрабаванням тэхнічных нарматыўных прававых актаў». Прайшоў ТА - едзь на здароўе. Навошта ж плаціць двойчы?

Аналагічна разважае і кіраўнік беларускай асацыяцыі ўладальнікаў і кіроўцаў аўтамабіляў Алег Маркевіч.

«Допускам машыны да руху з'яўляецца сертыфікат тэхагляду, ніякай іншай княжацкай ласкі не трэба. Гэтага ў законе няма. Я разумею, што бюджэт трашчыць па швах і ім патрэбныя грошы. Хай тады ўвядуць падатак на соль, на паветра, падушны падатак, як было калісьці ў гісторыі», - заявіў ён у інтэрв'ю «Радыё Свабода».

Эксперты выказваюць яшчэ адно меркаванне пра прычыну ўвядзення новага збору з уладальнікаў транспартных сродкаў. Можа быць, дадзеная пошліна зможа часткова кампенсаваць страты беларускага бюджэту ад ўвядзення ў Расеі ўтылізацыйнага збору. З-за гэтага беларуская тэхніка, вырабленая на МАЗе, БелАЗе, МТЗ, «Амкадоры» стала менш канкурэнтаздольнай на рынку суседняй дзяржавы.

Як бы там ні было, ад новай дзяржпошліны ні адзін аўтаўладальнік не выйграе. А можа, нам усё ж такі растлумачаць, куды пойдуць сродкі, якія плануецца забараць у гаспадароў аўтатранспарту?