Пяскоў пракаментаваў асабістае жыццё Пуціна

Прэс-сакратар прэзідэнта Расеі пракаментаваў інфармацыю аб тым, што дачка Пуціна жыве ў Карэі.

Сямейнае жыццё прэзідэнта Расеі Уладзіміра Пуціна заўсёды будзе пад завесай сакрэтнасці, заявіў яго прэс-сакратар Дзмітрый Пяскоў, перадае BBC.

«Чутак ходзіць шмат. Але мы ніколі нічога не расказваем пра сям'ю Уладзіміра Пуціна і не будзем гэтага рабіць», - сказаў прэс-сакратар у інтэрв'ю часопісу New Times.

Паводле яго слоў, сям'я для Пуціна - «асабістая тэрыторыя, на якую ніхто не павінен залазіць».

Падобныя заявы рэгулярна зыходзяць як ад самога Пуціна, так і ад яго прэс-сакратара, аднак рэдка адмова даваць інфармацыю выказвалася ў настолькі катэгарычнай форме.

Карэйскі зяць?

Заявы Пяскова сталі адказам на пытанне аб тым, ці сапраўды Пуцін нядаўна ездзіў у Паўднёвую Карэю, каб наведаць дачку, як пісалі карэйскія СМІ.

«Гэта няпраўда, ён прыляцеў у Сеул у тры гадзіны ночы, потым у адзінаццаць раніцы пачалася рабочая праграма, якая скончылася позна вечарам, і ён адразу паляцеў дадому», - сказаў Пяскоў.

У Паўднёвай Карэі пісалі, што афіцыйны візіт Пуціна ў Сеул 12 лістапада пераследваў і асабістыя мэты - адсвяткаваць гадавіну вяселля дачкі.

Паведамленні аб тым, што малодшая дачка Пуціна Кацярына выйшла замуж за сына былога ваеннага аташэ Паўднёвай Карэі ў Расеі, часта з'яўляюцца ў СМІ. Пяскоў адмовіўся пацвярджаць або аспрэчваць гэтую інфармацыю.

«Больш закрытая сістэма»

Калі ў расейскай прэсе тэму сям'і расейскага прэзідэнта часцяком свядома абмінаюць, то ў заходніх СМІ выказваюцца меркаванні аб тым, што таямнічасць вакол дзяцей і цяпер ужо былой жонкі Пуціна Людмілы, даўно перайшла разумныя рамкі.

Прэс-сакратар расейскага прэзідэнта патлумачыў гэтую сакрэтнасць, у прыватнасці, тым, што інфармацыя пра сям'ю Пуціна папросту не патрэбная выбаршчыкам.

«Ведаеце, калі важна для палітыка яго ўзроўню распавядаць пра сям'ю? Калі палітык выходзіць на выбары і людзі не ведаюць, што гэта за чалавек. І ён павінен выкарыстоўваць увесь арсенал дадзеных, каб выбаршчыкаў пераканаць: глядзіце, я вось такі, вось такая ў мяне сям'я, галасуйце за мяне. Пуцін добра вядомы свайму выбаршчыку, і тым, хто за яго галасуе, ужо не трэба нічога пра яго распавядаць», - сказаў Пяскоў.

Пры гэтым ён прызнаў, што ў пытанні асабістага жыцця прэзідэнта «ў нас больш закрытая сістэма».

Да таго як Уладзімір і Людміла Пуціны абвясцілі аб сваім разводзе ў ліпені, першая лэдзі краіны на працягу некалькіх гадоў амаль не з'яўлялася на публіцы.

У сакавіку 2012 года, адказваючы на чарговае пытанне пра сям'ю, Пуцін папрасіў пакінуць яго жонку і дачок у спакоі.

«Члены маёй сям'і не займаюцца ні палітыкай, ні бізнесам, нікуды не лезуць, і я б хацеў, каб усе іх пакінулі ў спакоі. Гэта звязана з іх асабістым дабрабытам, з бяспекай», - заявіў ён на сустрэчы з галоўнымі рэдактарамі замежных СМІ.

Тады Уладзімір Пуцін казаў, што яго дочкі ўжо сканчаюць навучанне ва ўніверсітэце і прыступаюць да навуковай працы.

Пра паступленне яго дачок у Санкт-Пецярбургскі дзяржаўны ўніверсітэт стала вядома ў 2003 годзе. Тады паведамлялася, што яго старэйшая дачка Марыя выбрала Біёлага-глебавы факультэт, а Кацярына - Усходні факультэт.