Развод-выключэнне

Пуцін паспяшаўся развесціся да таго, як па яго ж указцы ў Расеі ўвядуць штрафы за разводы.

Звычайна расейцы даведваюцца пра сур'ёзныя змены ў сваёй краіне дзякуючы балету, жартуе аглядальнік Tageszeitung Клаўс-Хэльзе Донат: на гэты раз гэта не «Лебядзінае возера» Чайкоўскага, а «Эсмеральда» па матывах рамана Віктара Гюго «Сабор Парыжскай Божай Маці». Пара Пуціных для паведамлення аб маючым адбыцца разводзе абрала гэты твор невыпадкова: «у ім паказаны канфлікт паміж абавязкам і любоўю».

«Тое, што Уладзімір і Людміла Пуціна ўжо доўга не жывуць разам, расейцы ведаюць даўно, - распавядае Донат. - Галоўная сенсацыя ў тым, што яны афармляюць развод і адкрыта кажуць пра гэта».

Бо апошнім кіраўніком дзяржавы, які дазволіў сабе развесціся, быў Пётр Першы, які кіраваў 300 гадоў таму. КПСС не вітала разводы сярод вышэйшых партыйных функцыянераў, нагадвае аўтар.

Пуцін жа, «з'яўляючыся традыцыяналістам, які настальгуе па СССР, усё ж парушыў табу». Былы сябар сям'і Пуціных, тэлевядучая Ксенія Сабчак лічыць, што пайсці на гэты крок прэзідэнта прымусіла жонка.

«Я ўпэўненая, што яна на яго націснула. Калі б не яна, ён бы так і працягваў жыць у такой сітуацыі», - лічыць Сабчак.

Тым больш, дадае аўтар, што развод «супярэчыць новай канцэпцыі сямейнай палітыкі, распрацоўку якой Пуцін даручыў Царкве, кіраўнік якой дапускае разводы толькі ў выключных выпадках».

Сярод іншага, гэтая канцэпцыя прадугледжвае штрафы пры разводзе і іх грамадскае ганьбаванне. Якіх-небудзь каментароў з нагоды разводу Пуціна з боку РПЦ пакуль няма, аднак, як піша Донат, «складваецца ўражанне, што яна раздражнёная».

Па дадзеных сацыялагічных апытанняў, расейцы паставіліся да весткі аб скасаванні шлюбу прэзідэнта спакойна. Разводы ў Расеі - звычайная справа. Аднак у кіраўніку дзяржавы, які традыцыйна лічыцца прыкладам для пераймання, могуць расчаравацца верныя яму выбаршчыкі ў асобе пажылых замужніх жанчын. «Пакараць» прэзідэнта на наступных выбарах могуць і маладыя расеянкі. Гэты сцэнар цалкам магчымы, калі Пуцін ажэніцца на больш маладой жанчыне. Калі ж прэзідэнт, падсумоўвае Донат, «прымерыць на сябе ролю аскета, то яго цалкам можа чакаць павышэнне: да паўбажаства і святога».

Пераклад: Inopressa.ru

Фота: AP