З 1 снежня ІП не выйдуць на працу
217- 4.11.2013, 16:56
- 213,717
Жорсткую рэзалюцыю сёння прыняў форум прадпрымальнікаў, які прайшоў у Мінску.
Яна стала адказам на заявы Пятра Пракаповіча аб тым, што ІП забароняць прадаваць тавары без суправаджальных дакументаў з 1 снежня.
Пра гэта сайту charter97.org паведаміў старшыня грамадскай арганізацыі «Перспектыва» Анатоль Шумчанка.
«Сёння прайшоў форум, на якім прысутнічала больш за 400 чалавек, чаго ніколі не было. Зала была перапоўненая, і ў ёй панавала вельмі высокае напружанне. У сярэдзіне форуму з'явіўся чыноўнік Мінгандлю, які адказваў на пытанні. Мы прынялі рэзалюцыю і вырашылі 25 лістапада правесці яшчэ адзін форум, але ўсе прысутныя сказалі, што з 1 снежня не будуць працаваць на тых умовах, пра якія было заяўлена», - сказаў адзін з лідараў прадпрымальніцкага руху.
Анатоль Шумчанка падкрэсліў, што людзі проста не выйдуць на працу, не будуць плаціць падаткі і ўсе астатнія плацяжы.
«Адказнасць за гэта ўскладзеная на Пракаповіча, які вядзе краіну да чарговага крызісу. Бо калі яго заявы будуць рэалізаваныя на ўзроўні ўрада, то з 1 снежня прадпрымальнікі проста не змогуць працаваць. Таксама было прынятае рашэнне аб тым, што да 1 чысла прадпрымальнікамі не будзе ажыццяўляцца ніякіх плацяжоў да таго часу, пакуль не будзе ўнесеная яснасць. Мы таксама маем намер звярнуцца ў Еўразійскі эканамічны суд з тым, каб дадзены Тэхрэгламент быў адменены», - адзначыў старшыня «Перспектывы».
Нагадаем, у Менску прайшоў форум індывідуальных прадпрымальнікаў на тэму «Тэхнічны рэгламент Мытнага саюза - беларускае пытанне». Сустрэча была прысвечаная праблемам увядзення тэхрэгламенту МС па бяспецы прадукцыі лёгкай прамысловасці.
Падставай для правядзення мерапрыемства сталі словы намесніка прэм'ер-міністра Беларусі Пятра Пракаповіча, які 31 кастрычніка заявіў, што з 1 снежня 2013 года індывідуальныя прадпрымальнікі не змогуць прадаваць тавары, якія не маюць дакументаў, што пацвярджаюць іх якасць і бяспеку ў адпаведнасці з патрабаваннямі тэхнічнага рэгламенту Мытнага саюза «Аб бяспецы прадукцыі лёгкай прамысловасці».