Пракаповіч: Грошай становіцца больш

Віцэ-прэм'ер расказаў пра чарговыя поспехі айчыннай эканомікі.

Пётр Пракаповіч заявіў, што доля малога і сярэдняга бізнесу ў ВУП Беларусі да канца наступнай пяцігодкі павінна скласці не менш за 50%, паведамляе БелТА.

Паводле яго слоў, удзел бізнесу ў развіцці эканомікі краіны ў апошнія гады няўхільна расце. У бягучым годзе доля малога і сярэдняга прадпрымальніцтва ва ўнутраным валавым прадукце складзе 24%, у наступным - 27%. Да канца пяцігодкі гэты паказчык плануецца давесці да 30%. «У цэлым з гэтай задачай мы спраўляемся, аднак узровень, які сёння ёсць па развіцці прадпрымальніцтва, не той, які хацелася б мець», - адзначыў ён.

Віцэ-прэм'ер адзначыў, што развіццё малога і сярэдняга бізнесу не з'яўляецца самамэтай урада. Дадзены працэс, паводле яго слоў, абумоўлены тым, што ў цяперашні час у краіне праводзіцца актыўная мадэрнізацыя прамысловасці, якая прывядзе да вызвалення часткі грамадзян, якія працуюць на прадпрыемствах, гэта значыць у прыватнага бізнесу з'явіцца магчымасць прыцягнуць дадатковыя кадры.

«Акрамя таго, у нас пакуль відавочна недастаткова беларускіх тавараў і беларускіх паслуг, каб забяспечыць попыт нашага насельніцтва ў неабходным аб'ёме. Зарплата насельніцтва паступова расце, грошай становіцца больш, а айчынных тавараў відавочна недастаткова», - падкрэсліў намеснік прэм'ер-міністра.

Задаволіць попыт на ўнутраным рынку тавараў і паслуг у пэўнай меры могуць прадпрыемствы малога і сярэдняга прадпрымальніцтва. На думку Пракаповіча, «гэта найбольш мабільная частка эканомікі, якая можа хутка змяняцца, прыстасоўвацца да патрабаванняў рынку, адказваць запытам насельніцтва, менавіта тут магчыма хутчэй атрымаць вынік».