BelToll недалічыўся дзесятка бартавых прыладаў

Карыстальнікаў платных дарог просяць вярнуць дзесяткі бартавых прыладаў BelToll.

На сайце сістэмы BelToll апублікаваны спіс бартавых прыладаў, якія пасля могуць быць заблакаваныя, калі іх своечасова не замяніць.

У тлумачэнні на сайце адзначаецца, што аператар сістэмы BelToll адклікае бартавыя прылады для наступнай замены «ў адпаведнасці з п.37 Палажэння аб парадку спагнання платы за праезд транспартных сродкаў па платных аўтамабільных дарогах Рэспублікі Беларусь».

Аглядальнік партала «Інтэрфакс» перачытаў Палажэнне. Сапраўды, аператар мае права адклікаць прыладу электроннай аплаты для наступнай замены шляхам апублікавання адпаведнай інфармацыі на афіцыйным сайце. Прычым без усялякіх тлумачэнняў прычыны. Карыстальнік жа абавязаны вярнуць прыладу ў пункт абслугоўвання, памежны пункт абслугоўвання або ў абслуговую арганізацыю, у якой была заключаная дамова карыстання платнай дарогай, у тэрмін, названы аператарам.

Тэрмін для вяртання, дарэчы, складае 14 каляндарных дзён. Нумары першых прылад, якія варта здаць, апублікаваныя 5 снежня. Калі бартавая прылада не будзе вернутая ў названы тэрмін, яе заблакуюць.

У выпадку несвоечасовага вяртання заблакаванай бартавой прылады карыстальнік платнай дарогі губляе права на вяртанне закладнога кошту за бартавую прыладу, а таксама на вяртанне астатку сродкаў перадаплаты.

Блакаванне таксама выключае магчымасць далейшага выкарыстання прылады для ўнясення платы за праезд. У гэтым выпадку аўтамабіль, на якім ўсталяваная блакаваная бартавая прылада, будзе зарэгістраваны як парушальнік, і інфармацыя аб ім будзе перададзена ў Транспартную інспекцыю.

Спіс адкліканых бартавых прыладаў пакуль складаецца з 32 пазіцый. Зварот і замену карыстальнікі могуць ажыццявіць у любым з пунктаў абслугоўвання кліентаў, калі дамова была заключаная ў рэжыме перадаплаты. Калі ж дамова складалася ў рэжыме аплаты па факце, то карыстач платнай дарогі можа абмяняць прыладу ў абслуговай арганізацыі, у якой была заключаная дамова карыстання платнай дарогай, альбо ў адным з пунктаў абслугоўвання кліентаў - у залежнасці ад паліўнай карты.

Па стане на сярэдзіну лістапада карыстальнікам сістэмы BelToll было выдадзена каля 140 000 бартавых прыладаў. Усяго ж у адпаведнасці з інвестдамовай у Беларусь завезена каля 400 000 такіх прылад.