У Брэсце раздавалі «Мужыцкую праўду»
9- 6.02.2013, 16:49
Брэсцкія актывісты культурна-асветніцкай ініцыятывы «Грунт» правялі акцыю, падчас якой раздавалі «Мужыцкую праўду» - газету да 150-годдзя паўстання Кастуся Каліноўскага.
Некалькі сотняў газет раздалі ў Брэсцкім універсітэце. Пасля актывісты выйшлі на пляцоўку перад навучальнай установай і працягвалі раздаваць газету там, перадае «Радыё Свабода».
Праз некалькі хвілін з універсітэта выйшаў ахоўнік, які загадаў актывістам пакінуць пляцоўку - маўляў, «тут нічога нельга раздаваць».
Актывісты працягнулі акцыю ў іншым месцы.
Актывісты ініцыятывы «Грунт» назвалі газету «Мужыцкай праўдай» у гонар той, якую выдаваў Кастусь Каліноўскі. Як кажа кіраўнік ініцыятывы Віктар Клімус, у гэтым годзе «сімвалічна плануецца выдаць 7 нумароў газеты».
«Мужыцкая праўда» Кастуся Каліноўскага выдавалася з ліпеня 1862 года па чэрвень 1863 года. Усяго выйшла 7 нумароў.