Паўторны суд над Мубаракам прызначаны на 13 красавіка
9- 3.03.2013, 13:50
Суд у Егіпце прызначыў дату паўторнага працэсу над былым прэзідэнтам краіны Хосні Мубаракам.
Яго вінавацяць у тым, што ён не прадухіліў гібель сотняў удзельнікаў акцый пратэсту, якія спрычыніліся да падзення ягонага рэжыму два гады таму, паведамляе ВВС.
«Паўторны разгляд справы паводле абвінавачвання былога прэзідэнта Егіпта Мубарака, а таксама экс-міністра ўнутраных спраў краіны Хабіба Адлі адбудзецца 13 красавіка 2013 года пад старшынствам кіраўніка апеляцыйнага суда егіпецкай сталіцы Саміра Абу Муаты», - сказаў кіраўнік тэхнічнага камітэта апеляцыйнага суда Каіра Усама Фарыд.
Былы дыктатар, які знаходзіцца цяпер на лячэнні ў вайсковым шпіталі, дамогся поспеху ў апеляцыі супраць папярэдняга прысуду да пажыццёвага зняволення, які быў вынесены ў чэрвені мінулага года.
Разгляд апеляцыі першапачаткова быў прызначаны на 2 снежня, але затым яго перанеслі на пачатак 2013 года. У сярэдзіне студзеня касацыйны суд Егіпта задаволіў апеляцыю адвакатаў экс-прэзідэнта на вынесены яму раней прысуд аб пажыццёвым зняволенні і пастанавіў прызначыць новае слуханне справы.