У Беларусі вырастуць кошты на інамаркі

Утылізацыйны збор, які ўводзіцца ў РФ, можа прывесці да росту коштаў на інамаркі ў Беларусі.

Так эканаміст Барыс Жаліба пракаментаваў сайту charter97.org расейскі законапраект аб утылізацыйным зборы на ўвазныя аўтамабілі.

«Прамой сувязі паміж утылізацыйным зборам і МАЗам я не разгледжу. Можа быць, я не дастаткова дальнабачны. Наколькі мне вядома, гэты закон уводзіцца для таго, каб павысіць кошты на імпартныя машыны. Уступленне Расеі ў СГА будзе яе абавязваць знізіць увазныя пошліны на інамаркі. ВАЗ заўсёды меў з гэтым праблемы, таму што не мог канкураваць з «імпартнымі аднакласнікамі». Расея абараняла айчынны аўтапрам высокімі пошлінамі, якія рабілі дарагімі машыны аналагічных тыпаў, што ўвозяцца на яе тэрыторыю, і тады ВАЗ выжываў. Для таго, каб кампенсаваць маючае адбыцца зніжэнне пошлін, яна як раз і ўводзіць утылізацыйны збор, які павысіць кошты на інамаркі», - адзначыў эксперт.

Ён падкрэсліў, што паколькі Беларусь уваходзіць у Мытны саюз, то нам гэта таксама пагражае.

«З аднаго боку Расею прымусяць знізіць пошліны, і мы павінны будзем зрабіць тое ж самае. Калі ж гэты збор распаўсюдзіцца на Беларусь, то прывядзе да падаражання інамарак і ў нашай краіне. Пасля ліпеня 2011 года мы пакуль што абараняем расейскі аўтапрам. Беларусь не выпускае легкавых аўтамабіляў. Таму, мы двухсэнсоўна залежым ад Расеі», - упэўнены эксперт.

Ён лічыць, што паглынанне МАЗа адбудзецца ў перспектыве, нягледзячы на вышэйзгаданы закон.

«Прыклад з утылізацыйным зборам і іншамаркамі сведчыць пра супярэчнасці, якія так ці інакш будуць узнікаць. І справа не толькі ў тым, што Расея ўваходзіць у СГА, а Беларусь не, і тым, што паміж імі створаны МС і «саюзная дзяржава». Эксперты бачаць супярэчнасць яшчэ і ў тым, што ў нас розныя эканомікі. Пытанне складаецца ў тым, як будзе адчуваць сябе Мытны саюз, калі эканоміка Расеі больш прыхільная эканамічным стандартам, а наша застаецца нейкай гібрыднай і знаходзіцца паміж рынкавай і камандна-адміністрацыйнай.

Гэта выяўляецца ў выглядзе так званых «малочных», «цукровых» і «мясных» войнаў, калі беларуская дзяржава адміністрацыйна, праз прэферэнцыі патанняе сельгаспрадукцыю, што ніяк не адносіцца да рынкавых метадаў. Расея гэтага не робіць. Усё гэта будзе праяўляцца і далей. У тым ліку ў пытанні з утылізацыйным зборам і ўвазнымі пошлінамі», - сказаў на заканчэнне Барыс Жаліба.

Нагадаем, Расея збіраецца распаўсюдзіць утылізацыйны збор на ўсе імпартныя аўтамабілі, у тым ліку вырабленыя ў Беларусі.