Мінінфарм вынес папярэджанне «БелМузТВ»
11- 15.04.2013, 17:26
Міністэрства інфармацыі Беларусі ў панядзелак вынесла папярэджанне тэлеканалу «БелМузТВ» па факце дэманстрацыі 13 красавіка ў дзённым эфіры порнароліка.
«Папярэджанне вынесена ў сувязі з парушэннем тэлеканалам артыкула 39 закона аб СМІ», - паведамілі парталу «Інтэрфакс» у ведамстве.
Паўторнае папярэджанне Мінінфарма на працягу года можа служыць падставай для закрыцця тэлеканала.
Нагадаем, 13 красавіка днём па тэлеканале «БелМузТВ» на працягу амаль 20 хвілін паказвалі спачатку відэакліпы забароненага ў Беларусі «Ляпіса Трубяцкога», а затым - порнаролік. Пасля гэтага канал спыніў вяшчанне.
Падазраваны супрацоўнік «БелМузТВ» быў затрыманы ў Магілёве мінулай ноччу. У дачыненні да гэтага супрацоўніка ўзбуджаная крымінальная справа па падазрэнні ў здзяйсненні злачынства, кваліфікаванага па ч.2 арт.343 Крымінальнага кодэкса Беларусі як «публічная дэманстрацыя матэрыялаў парнаграфічнага зместу з выкарыстаннем сетак электрасувязі агульнага карыстання».
Затрыманы супрацоўнік «БелМузТВ» патлумачыў свае дзеянні прыгнечаным псіхічным станам, які ўзнік у яго пасля сваркі з дзяўчынай.