МВФ не верыць у прагнозы беларускіх уладаў

Міжнародны валютны фонд (МВФ) прагназуе рост ВУП Беларусі ў 2013 годзе на ўзроўні 2,1%.

Пра гэта гаворыцца ў абноўленым аглядзе сусветнай эканомікі (World Economic Outlook, WEO), піша «Інтэрфакс».

У кастрычніку 2012 года МВФ прагназаваў рост беларускай эканомікі ў 2013 годзе ў межах 3,4%.

Эксперты фонду нязначна палепшылі ацэнку дэфіцыту рахунку бягучых аперацый аплатнага балансу Беларусі ў 2013 годзе - да 5,2% ВУП з 5,8% ВУП. У 2012 годзе дэфіцыт бягучага рахунку склаў 2,9% ВУП супраць 10,5% ВУП у 2011 годзе.

Таксама палепшаная адзнака гадавой інфляцыі (12 месяцаў 2013 года да 12 месяцаў 2012 года). Цяпер МВФ чакае, што інфляцыя ў Беларусі ў гэтым годзе складзе 20,5%, а не 30,6%, як меркавалася ў ранейшым прагнозе. У 2012 годзе гадавая інфляцыя ў Беларусі склала 59,2%. У 2014 годзе МВФ ацэньвае гадавую інфляцыю ў Беларусі на ўзроўні 15,5%.

Таксама МВФ прагназуе стабільна нізкі ўзровень афіцыйнага беспрацоўя ў Беларусі - 0,6% у 2013-2014 гадах пры такім жа фактычным узроўні ў 2011-2012 гадах.

У дакладзе сказана, што Беларусь павінна сканцэнтравацца на зніжэнні інфляцыі і захаваць жорсткую грашова-крэдытную палітыку. Акрамя таго, у дакладзе падкрэсліваецца, што Беларусь, як і іншыя краіны рэгіёну, востра мае патрэбу ў правядзенні структурных рэформаў і паляпшэнні бізнес-клімату. Пры гэтым для Беларусі прыярытэтам павінны стаць лібералізацыя коштаў, рэфармаванне прадпрыемстваў і прыватызацыя, мяркуюць эксперты МВФ.

Як паведамлялася, у адпаведнасці з мэтавым прагнозам беларускіх уладаў, ВУП краіны ў гэтым годзе павінен вырасці на 8,5%. Бюджэт краіны падрыхтаваны зыходзячы з кансерватыўнага прагнозу росту эканомікі ў гэтым годзе на 6%. За першы квартал 2013 прырост ВУП склаў 3,5%.

У 2012 годзе ВУП Беларусі вырас на 1,5% пры мэтавым прагнозе 5-5,5%.