Мінфін пазычыў у беларусаў яшчэ $75 мільёнаў

Міністэрства фінансаў размясціла чарговы выпуск валютных аблігацый.

Пра гэта паведамляе сайт Беларускай валютна-фондавай біржы (БВФБ).

Гаворка ідзе пра 101-ы выпуск валютных дзяржаўных аблігацый на агульную суму $75 млн з фіксаванай стаўкай купона 6,9% гадавых і тэрмінам абарачэння 4 гады.

Пакупніком аблігацый выступіла юрыдычная асоба. Размешчаны выпуск ужо дапушчаны да другаснага абарачэння на БВФБ.

Дата пагашэння каштоўных папер - 24 красавіка 2017 года. Намінал аблігацыі складае $100 тыс. У рамках выпуску прадугледжана выплата 16 купонаў.

Нагадаем, у пачатку лютага 2013 года Міністэрства фінансаў размясціла 99-ы выпуск валютных дзяржаўных доўгатэрміновых аблігацый на суму $50 млн пад 7% гадавых. Тэрмін абарачэння дзяржаблігацый - 3 гады. Акрамя таго, 25 красавіка Мінфін плануе правесці біржавы аўкцыён па продажу трохгадовых валютных дзяржаблігацый для юрыдычных асоб аб'ёмам $50 млн. Стаўка адсоткавага даходу па іх складзе 7,25% гадавых.

Усяго, па дадзеных БВФБ, у цяперашні час да абарачэння на біржы дапушчана 17 выпускаў валютных дзяржаўных доўгатэрміновых аблігацый на агульную суму каля $1,5 млрд.

Мінфін Беларусі аднавіў размяшчэнне валютных дзяржаўных папер у лістападзе 2012 года пасля адмены дзеючай з 1999 года забароны на другаснае абарачэнне дзяржаблігацый у замежнай валюце на ўнутраным рынку.