Смаленскія ўлады - супраць помніка Качыньскаму

Улады Смаленскай вобласці выступілі супраць будаўніцтва памятнага знака на месцы гібелі Леха Качыньскага.

Яны ўпэўненыя, што вялікая плошча комплексу будзе раздражняць мясцовае насельніцтва, паведамляе газета «Известия».

Дамоўленасць пра помнік загінулым у катастрофе пад Смаленскам была дасягнутая лідарамі Расеі і Польшчы Дзмітрыем Мядзведзевым і Браніславам Камароўскім яшчэ ў 2011 годзе. Палякі павінны былі прафінансаваць стварэнне манумента, а расейскі бок - уладкаваць тэрыторыю. Адкрыць яго збіраліся ў красавіку 2013 года, аднак працы да гэтага часу не вядуцца.

Адна з прычын, па версіі мясцовых уладаў, - запыты польскага боку, які разлічвае, што ўлады Смаленскай вобласці выдзеляць тэрыторыю ў 100 тыс. кв. м. На гэтай тэрыторыі палякі хочуць размясціць збудаванне даўжынёй 115 м, капліцу, невялікі музей, паркоўку і ахоўную зону. Характэрна, што дызайн праекта быў у мінулым годзе ўзгоднены паміж Масквой і Варшавай.

Аднак цяпер у Смаленску лічаць, што жыхары вобласці не зразумеюць, калі помнік зойме столькі месца. «Мы не можам дазволіць сабе зрабіць з гэтага мемарыяла раздражняльнік для нашага насельніцтва, для ветэранаў вобласці», - заявіў губернатар вобласці Аляксей Астроўскі. Ён не ўдакладніў, чым манумент будзе раздражняць ветэранаў, але паабяцаў, што працы давядуць да канца.

Катастрофа самалёта Ту-154 10 красавіка 2010 года стала адной з чорных старонак у гісторыі Польшчы. Акрамя прэзідэнта Леха Качыньскага, на борце знаходзіліся яшчэ 95 чалавек. Яны накіроўваліся ў Катынь, дзе павінны былі прайсці жалобныя мерапрыемствы ў памяць забітых там падчас Другой сусветнай вайны польскіх афіцэраў.

Фотa: reuters.com