«Льготнікам» забароняць здаваць кватэры ў арэнду

Здача ў арэнду жылля, пабудаванага з дзяржпадтрымкай, на працягу пяці гадоў пасля завяршэння выплаты крэдыту будзе забароненая.

Гэта прадугледжана зменамі ва ўказе № 13 ад 6 студзеня 2012 года «Аб некаторых пытаннях прадастаўлення грамадзянам дзяржаўнай падтрымкі пры будаўніцтве (рэканструкцыі) або набыцці жылых памяшканняў». Аб новаўвядзеннях паведаміў сёння журналістам начальнік упраўлення жыллёвай палітыкі Мінбудархітэктуры Аляксандр Горваль, каментуючы прынятую ўрадам Канцэпцыю жыллёвай палітыкі на 2013-2016 гады, перадае БелТА.

«Канцэпцыяй прадугледжана, што дзяржаўная падтрымка грамадзян, якія маюць патрэбу ў паляпшэнні жыллёвых умоў, будзе аднаразовай, - адзначыў Аляксандр Горваль. - Калі сям'я ўжо атрымлівала падтрымку ў выглядзе льготнага крэдыту або субсідыі, то ўжо паўторна яна падавацца не будзе, за выключэннем аднаго выпадку: калі патрэбнасць у паляпшэнні жыллёвых умоў узнікла ў сувязі з павелічэннем сям'і пры нараджэнні (усынаўленні, удачарэнні) дзяцей».

Механізмы гэтай дзяржпадтрымкі вызначаныя дапаўненнямі ва ўказ № 13. «Дадзеная пазіцыя ўжо ўнесеная ў праект змяненняў ва ўказ, ён падрыхтаваны і ў цяперашні час знаходзіцца на разглядзе ў адміністрацыі Лукашэнкі. Там гэты тэзіс прапісаны», - сказаў Аляксандр Горваль.

Акрамя таго, ва ўказ № 13 будуць унесеныя змяненні, якія датычацца здачы ў арэнду жылля, пабудаванага з дзяржпадтрымкай. Будзе забароненая здача ў арэнду жылля, пабудаванага з дзяржпадтрымкай, на працягу пяці гадоў пасля завяршэння выплаты крэдыту, які падаваўся на будаўніцтва такіх жылых памяшканняў, адзначыў прадстаўнік Мінбудархітэктуры.

Аляксандр Горваль таксама растлумачыў механізм атрымання жылля па дзяржзамове.

«На першым этапе дзяржаўная замова будзе распаўсюджвацца толькі на чаргавікоў, якія маюць права на дзяржаўную падтрымку», - адзначыў ён. Гэта тлумачыцца тым, што будаўніцтва жылога фонду па дзяржзамове будзе ажыццяўляцца за льготныя крэдыты, аналагічныя тым, якія выдзяляюцца грамадзянам. Гэта значыць льготны крэдыт першапачаткова будзе выдавацца не чалавеку, а ўпраўленню капітальнага будаўніцтва, за гэтыя грошы будзе будавацца жыллё, а потым перадавацца грамадзянам. «Таму ў бліжэйшы час, па меншай меры, дзяржаўны заказ на жыллё будзе ажыццяўляцца для катэгорыі чаргавікоў, якія маюць права на дзяржпадтрымку», - удакладніў ён.