АЭС у Беларусі: Літва разлічвае на падтрымку Еўразвяза
6- 10.05.2013, 17:11
Будучае старшынства Літвы ў Радзе Еўразвяза будзе добрай нагодай абмеркаваць энергетычныя праекты, якія рэалізуюцца паблізу яе межаў.
Сярод іх - і будаўніцтва АЭС у Беларусі. Пра гэта заявіў міністр энергетыкі Літвы Яраслаў Невяровіч.
«У плане адносін з трэцімі дзяржавамі - нам было б карысна пагаварыць з нашымі партнёрамі ў ЕЗ, якое стаўленне і якімі могуць быць агульныя пазіцыі з нагоды праектаў трэціх краін. Думаю, падчас нашага старшынства мы знойдзем нагоду абмеркаваць гэтае пытанне з калегамі па ЕЗ», - сказаў міністр энергетыкі, перадае ru.delfi.lt.
Яраслаў Невяровіч падкрэсліў, што на сустрэчы з камісарам ЕЗ па энергетыцы Гюнтэрам Этынгерам, які знаходзіцца ў Літве, яшчэ раз пачуў запэўніванні еўракамісара ў тым, што ЕЗ будзе падтрымліваць Літву на перамовах аб зніжэнні коштаў на газ і рэалізацыі Трэцяга энергетычнага пакета з расейскім «Газпрамам».
«Мы яшчэ раз пачулі пра гатоўнасць Еўракамісіі падтрымліваць нас на перамовах з нашымі партнёрамі ў плане рэалізацыі Трэцяга энергетычнага пакета, пачулі, што Камісія і ў далейшым будзе актыўна ўдзельнічаць у кансультацыях і перамовах з прадстаўнікамі «Газпрама», і мы будзем працягваць гэта цеснае супрацоўніцтва», - сказаў міністр энергетыкі.
Паблізу Літвы будуюцца дзве атамныя станцыі - у Калінінградскай вобласці Расеі і ў Гродзенскай вобласці Беларусі, у Астраўцы, што ў 50 км ад сталіцы Літвы.
Літва сцвярджае, што праекты, рэалізацыя якіх ідзе ў Калінінградзе і Беларусі, выклікаюць сумневы адносна іх ўздзеяння на навакольнае асяроддзе і не адпавядаюць патрабаванням міжнародных канвенцый.