Расея ўзмацняе ваенную прысутнасць на Міжземным моры

Групоўка расейскіх караблёў у Міжземным моры будзе ўзмоцненая ў бліжэйшы час.

Пра гэта сказаў галоўнакамандуючы ВМФ Расеі адмірал Віктар Чыркоў, перадае BBC.

Штаб аператыўнага злучэння будзе створаны ўжо летам 2013 года, ён будзе размяшчацца на флагманскім караблі групоўкі.

Карабельны склад Міжземнаморскага аператыўнага злучэння складзе пяць-шэсць адзінак і больш, прычым у яго склад, магчыма, увойдуць падводныя лодкі, сказаў адмірал.

«Магчыма. У перспектыве. Яны ж там і былі ў часы існавання 5-й эскадры [5-я Міжземнаморская эскадра караблёў ВМФ СССР]. Там і атамныя падводныя лодкі былі, і дызельныя. Усё будзе залежаць ад абставін», - сказаў Чыркоў .

«Ужо з гэтага года плануецца мець у складзе злучэння пяць-шэсць караблёў і судоў забеспячэння, якія будуць мяняцца на ратацыйнай аснове ад кожнага з флатоў - Чарнаморскага, Балтыйскага, Паўночнага і ў асобных выпадках нават Ціхаакіянскага. У залежнасці ад аб'ёму пастаўленых задач і іх складанасці колькасць караблёў у складзе злучэння можа павялічвацца», - сказаў галоўнакамандуючы.

Акрамя таго, па словах адмірала, камандаванне флота плануе ў перспектыве ўключэнне верталётаносца тыпу «Містраль» у якасці штабных караблёў у Міжземнаморскае злучэнне.

Чыркоў ў гэтым інтэрв'ю абышоў увагай пункт матэрыяльна-тэхнічнага забеспячэння Тартус на тэрыторыі Сірыі, які ў прэсе часта называюць ваеннай базай.

У адпаведнасці з пагадненнем 1971 года Расея арандуе аб'екты ў Тартусе ў рамках спісання шматмільярдных пазык Сірыі.

Па словах шэрагу экспертаў, у цяперашнім выглядзе «база» з'яўляецца ўсяго толькі невялікім тэхнічным пунктам для абслугоўвання караблёў.

Раней некаторыя СМІ паведамлялі, што праз гэты порт ажыццяўляліся пастаўкі расейскіх узбраенняў ураду Асада.

Пастаўкі зброі

Расея не адмаўляе, што пастаўляе зброю сірыйскім уладам, аднак сцвярджае, што расейская зброя не выкарыстоўваецца для барацьбы з паўстанцамі. ЗША і краіны Захаду, наадварот, падтрымліваюць сірыйскую апазіцыю, пры гэтым Вашынгтон настойвае, што не пастаўляе зброю паўстанцам.

За некалькі дзён да гэтага інтэрв'ю дыпламаты з Ізраіля і краін Захаду паказалі на прыкметы падрыхтоўкі да пастаўкі расейскіх зенітна-ракетных комплексаў С-300 Башару Асаду, што, на іх думку, можа кардынальна змяніць расстаноўку сіл у Сірыі, якая раздзіраецца грамадзянскай вайной.

Знешнепалітычныя ведамствы Расеі і Сірыі ніяк не каментуюць гэтыя паведамленні.

Тым часам у інтэрв'ю агенцтву Рэйтэр неназваны супрацоўнік ізраільскага ўрада заявіў, што Ізраіль звяртаўся да Масквы з просьбай не ажыццяўляць пастаўку комплексаў.

Чарнаморскі флот

Па словах адмірала, у бліжэйшыя гады Расея ўзмоцніць свой Чарнаморскі флот.

У склад флоту будуць уключаныя шэсць новых падлодак і шэсць фрэгатаў, караблі, якія зараз знаходзяцца ў баявым складзе Чарнаморскага флоту, будуць рамантавацца.

Галоўнакамандуючы ВМФ таксама распавёў, што хоць асноўным пунктам базавання караблёў Чарнаморскага флота будзе заставацца Севастопаль, Наварасейская ваенна-марская база будзе цалкам рэканструяваная каб забяспечыць у 2014 годзе базаванне караблёў і падводных лодак.

Фота: ІТАР-ТАСС