«American Thinker»: Пуцін бярэ СМІ пад кантроль на выпадак краху эканомікі

За адзін тыдзень рэжым Уладзіміра Пуціна і сітуацыю са свабодай друку ў Расеі раскрытыкавалі адразу тры найбуйнейшыя міжнародныя праваабарончыя арганізацыі.

Пра гэта піша выданне «American Thinker» (пераклад ИноТВ).

«Рэпарцёры без межаў» распавялі пра расейскага прэзідэнта як пра «ворага свабоднай прэсы, зацыкленага на камандаванні», адзначыўшы, што «ўзровень беспакаранасці тых, хто здзяйсняе гвалт у адносінах да журналістаў, застаецца ў краіне абсалютна непрымальным».

Больш за тое, «Камітэт абароны журналістаў» і зусім назваў Пуціна «забойцам», паведамляе выданне. Арганізацыя занесла Расею ў спіс краін, дзе «журналістаў забіваюць пастаянна і дзяржаве не ўдаецца раскрываць злачынствы». «Калі зараз колькасць забойстваў і становіцца менш, то толькі таму, што ўсе сур'ёзныя журналісты альбо з'ехалі з краіны, альбо трапілі ў турму, альбо ўжо забітыя».

Яшчэ адна праваабарончая арганізацыя, Freedom House, у сваёй штогадовай справаздачы паставіла Расею на 176 месца ў спісе краін, дзе выконваецца свабода СМІ, патлумачыўшы гэта новымі мерамі, якія Расея прыняла ў 2012 годзе ў дачыненні да інфармацыі ў Інтэрнэце.

На думку праваабаронцаў, свабода прэсы ў Расеі знаходзіцца на ўзроўні Пакістана, Афганістана і Самалі. Яны лічаць, што «Пуцін саджае ў турму тых журналістаў, якіх не можа запалохаць, і забівае тых журналістаў, якіх не можа пасадзіць». Прычым, прычына такога стаўлення да свабодных СМІ крыецца ў тым, што расейская эканоміка знаходзіцца «на мяжы катастрофы», і, калі здарыцца калапс, Пуціну спатрэбіцца поўны кантроль над мас-медыя, лічыць American Thinker.

Расейская эканоміка ўжо ўступіла ў фазу рэцэсіі, лічаць некаторыя эксперты. Інфляцыя за апошні год вырасла ўдвая, а фондавая біржа ў першым квартале гэтага года асела на 15%. Прычына такіх паказчыкаў можа быць толькі адна: з-за зніжэння міжнароднага попыту і распрацоўкі сланцавых радовішчаў падаюць кошты на нафту. А Пуцін так нічога і не зрабіў, каб пазбавіць Расею ад нафтавай залежнасці, піша аўтар артыкула.

Унутры Расеі ўжо наспяваюць пратэсты, паведамляе выданне. Уладзе Пуціна адкрыта кідаюць выклік такія асобы, як Аляксей Навальны і Барыс Нямцоў. Навальны цяпер можа атрымаць 10 гадоў турмы, і Нямцову можа пагражаць такая ж доля, прадракае журналіст.

Пры гэтым Пуцін усведамляе, што калі кошты на нафту будуць зніжацца, яму могуць у хуткім часе пагражаць паўсюдныя сацыяльныя пратэсты. У сувязі з гэтым яму спатрэбіцца абсалютны кантроль над інфармацыйным патокам, які будзе паступаць у масы. «Кантроль такога роду, як быў у савецкія часы», - удакладняе выданне. Так ён зможа не толькі адфільтроўваць негатыўную інфармацыю і даваць ілжывыя звесткі, але і «вінаваціць «замежных агентаў», асабліва ЗША, у падрыве расейскай эканомікі і распальваць ксенафобію і параною, спадзеючыся, што расейцы забудуць, хто «камандуе парадам» ужо амаль 15 гадоў».

Прычым падрыхтаваць усё гэта Пуцін зможа, толькі калі амерыканскі прэзідэнт стане яму ў гэтым патураць. Калі «Абама так і будзе весці сваю баязлівую палітыку прымірэння Расеі, з-за якой Рональд Рэйган у труне пераварочваецца, то мы ўбачым, як Расея зноў скаціцца ў змрок таталітарызму», прадракае American Thinker.