Апошнія званкі ў школах празвіняць 30-31 траўня

Выпускныя экзамены будуць праводзіцца з 1 да 12 чэрвеня.

Міністэрства адукацыі Беларусі рэкамендавала ў гэтым навучальным годзе правесці астатнія званкі для навучэнцаў 9-х і 11-х класаў 30-31 траўня, піша БелаПАН.

Выпускныя экзамены пройдуць з 1 да 12 чэрвеня. Выпускнiкi 9-х класаў будуць здаваць чатыры абавязковыя іспыты: «Беларуская мова» (пісьмова), «Расейская мова» (пісьмова), «Матэматыка» (пісьмова), «Гісторыя Беларусі» (вусна).

Выпускнікі 11-х класаў таксама здаюць чатыры абавязковыя іспыты: «Беларуская мова» або «Расейская мова» на выбар (пісьмова), «Матэматыка» (пісьмова), «Замежная мова» (вусна), яшчэ адзін экзамен здаецца на выбар.

Выпускны экзамен на выбар можа здавацца ў адным з наступных прадметаў: «Беларуская мова» (пераказ), «Расейская мова» (пераказ), «Беларуская літаратура» (вусна), «Расейская літаратура» (вусна), «Гісторыя Беларусі» (вусна ці абарона рэферата), «Сусветная гісторыя» (вусна ці абарона рэферата), «Геаграфія» (вусна), «Біялогія» (вусна), «Хімія» (вусна), «Фізіка» (вусна), «Астраномія» (вусна) , «Інфарматыка» (вусна), «Грамадазнаўства» (вусна), «Фізічная культура і здароўе» (у практычнай форме). У якасці выпускнога экзамену на выбар навучэнцы, якія асвойваюць змест адукацыйнай праграмы прафесійнай падрыхтоўкі рабочых (служачых), могуць выбраць кваліфікацыйны экзамен.

Выпускныя вечары для вучняў 11-х класаў міністэрства рэкамендавала правесці 10-12 чэрвеня. Цэнтралізаванае тэставанне ў вучэбных прадметах пачнецца 14 чэрвеня.