ЗША выявілі ў Паўночнай Карэі 200 усталёвак для ракет
3- 17.05.2013, 10:03
Паўночная Карэя мае 200 мабільных пускавых усталёвак для пускаў ракет рознага радыўсу дзеяння.
Пра гэта гаворыцца ў дакладзе Пентагона, прадстаўленым кангрэсу ЗША.
Інфармацыю пра гэта раскрыў Інстытут абаронных даследаванняў Паўднёвай Карэі.
У дакладзе гаворыцца, што 100 пускавых усталёвак прызначаныя для ракет «Скад» блізкага радыўсу дзеяння, 50 - для ракет «Надон» сярэдняга радыўсу дзеяння і 50 - для ракет «Мусудан» вялікай далёкасці.
Раней выведка Паўднёвай Карэі паведамляла пра тое, што ў КНДР налічваецца не больш за 94 мабільныя пускавыя ўсталёўкі.
Нагадаем, Менскі завод колавых цягачоў вінавацілі ў пастаўках у КНДР цяжкіх шасі беларускай распрацоўкі, прызначаных для пускавых усталёвак ракет.
КНДР абвясціла сябе ядзернай дзяржавай у 2005 годзе. У 2006, у 2009 і 2013 гадах былі праведзеныя падземныя ядзерныя выпрабаванні, якія выклікалі пратэсты з боку міжнароднай супольнасці. Стасункі паміж Пхеньянам і Сеўлам значна пагоршыліся пасля жорсткай рэакцыі КНДР на правядзенне ЗША і Паўднёвай Карэяй шырокамаштабных ваенных вучэнняў.