Пры пасадцы ва «Внуково» загарэўся самалёт

(абноўлена - 09.20) Маскоўскі аэрапорт «Внуково» не прымаў рэйсы праз аварыю, якая адбылася з адным з самалётаў.

Надзвычайнае здарэнне адбылося з пасажырскім «Боінгам» авіякампаніі «Ютэйр» пасля пасадкі, паведаміла крыніца ў авіядыспетчарскіх службах аэрапорта ў суботу, паведамляе «Інтэрфакс».

Паводле звестак кампаніі «Ютэйр», на борце было 129 пасажыраў. МУС паведамляе аб эвакуацыі 136 чалавек. Пасажыраў эвакуявалі праз аварыйныя трапы.

«Самалёт Boeing-737 выконваў рэйс з Стаўрапаля ў Маскву і пры пасадцы ва « Внуково» пад 8:00. на левай стойцы шасі у самалёта палопаліся і загарэліся ўсе пакрышкі. Пажар удалося хутка патушыць, ніхто не пацярпеў», - адзначыла крыніца. Паводле звестак авіякампаніі, рэйс №350 выконвае самалёт Boeing-737-400.

Самалёт знаходзіцца на ўзлётна-пасадачнай паласе, пасажыраў з яго эвакуявалі.

Аэрапорт не прымаў і не адпраўляў рэйсы цягам амаль двух гадзін пасля аварыі. Самалёты, прыбыццё якіх чакалася ва «Внуково», былі накіраваныя ў іншыя маскоўскія аэрапорты.

Гэта не першая аварыя, якая адбылася ў гэтым маскоўскім аэрапорце. 29 снежня мінулага года пасажырскі самалёт Ту-204 кампаніі Red Wings Airlines пры пасадцы выкаціўся за межы ўзлётна-пасадачнай паласы. Самалёт разваліўся на тры часткі і загарэўся. Чацвёра чалавек загінулі.