Спартак Мірановіч: Хацелася б выйграць трафей упершыню за 25 гадоў

На прэс-канферэнцыі, прысвечанай фінальнаму паядынку Кубка выкліку з люксембургскім «Эшам» галоўны трэнер СКА Спартак Мірановіч падзяліўся думкамі аб маючай адбыцца сустрэчы.

- Усе разумеюць, што кубкавае супрацьстаянне ўключае два паядынкі. А ў нас ёсць традыцыя выступаць у гасцях лепш, чым дома. Таму ў нас прысутнічае невялікая трывога. Хацелася б выйграць трафей упершыню амаль за 25 гадоў. У каманды з Люксембурга цалкам нармальны ўзровень. Чакаем гульні...

- Можаце параўнаць пачуцці ад статусных гульняў у 80-я гады і сённяшнія?

- Зразумела, што тады гэта было ўпершыню. Мы былі маладзей. Узровень каманды быў больш дарослы. І стаўленне да нас было звышпільнае. Але калі і ў гэты раз прыйдзе шмат гледачоў, будзе добра. Зараз жа ў нас (у мяне асабіста) ёсць нейкі досвед. Адчуваю сябе больш упэўнена, чым 30 гадоў таму. Тым больш у нас зачын пасля выязной гульні. Робім усё, каб у суботу не разгубіць перавагу.

- Які матч для СКА важней: фінал Кубка выкліку або наступны з «Дынама», за чэмпіёнства?

- Сённяшні або заўтрашні, але не паслязаўтрашні.

Як нагадвае «Прессбол», гульня пройдзе ў суботу, 25 траўня, на «Менск-Арэне». Пачатак - у 18.00.