Справай «Экамедсервіса» зоймецца СК

Следчы камітэт прыняў да вытворчасці матэрыялы крымінальнай справы па факце гібелі пацыенткі «Экамедсервіса» Юліі Кубаравай.

Дадзеная крымінальная справа перададзеная з УКБ па Менску для расследавання ў Следчы камітэт. Яе будзе расследаваць галоўнае следчае ўпраўленне СК Беларусі, паведамляе агенцтва «Інтэрфакс».

Нагадаем, у рамках расследавання крымінальнай справы па факце смерці пацыенткі «Экамедсервіса» Юліі Кубаравай былі затрыманыя шэсць чалавек. Адна з затрыманых - дырэктар медыцынскага цэнтра Галіна Валжанкіна, астатнія - аперацыйная брыгада, якая праводзіла рынапластіку 23-гадовай жыхарцы Гродна: хірург, урач-анестэзіёлаг і дзве медсястры, а таксама галоўны інжынер медцэнтра.

Пасля таго, як Лукашэнка запатрабаваў «самых жорсткіх» мер у дачыненні да медработнікаў і адміністрацыі цэнтра, 3 траўня было прынятае рашэнне аб узбуджэнні крымінальнай справы па ч. 2 арт. 162 КК Беларусі па факце неналежнага выканання прафесійных абавязкаў медыцынскімі работнікамі, што пацягнула па неасцярожнасці смерць пацыента.

Як мяркуецца, прычынай смерці 23-гадовай Юліі Кубаравай пасля пластычнай аперацыі стала няспраўнасць абсталявання.

У ходзе праверкі было ўстаноўлена, што апарат штучнай вентыляцыі лёгкіх, які ўжываўся пры аперацыі, непасрэдна пасля аперацыі быў адрамантаваны.