Грабоўскі дапамог «Таронта» перамагчы «Бостан» у Кубку Стэнлі

Хакеісты «Таронта» абыгралі на выездзе «Бостан» у другім матчы першага раўнда Кубка Стэнлі і зраўнялі лік у серыі, якая працягнецца да 4 перамог аднаго з супернікаў.

«Бостан» - «Таронта» - 2:4 (0:0, 1:2, 1:2). Шайбы: 1:0 - Хортан, 1:1 - Лупула, 1:2 - Лупула, 1:3 - Кэсел, 2:3 - Бойчак, 2:4 - ван Рымсдайк.

У складзе «Бостана» на лёд не выйшаў абаронца Эндру Ферэнц, які ў першым матчы ўдарыў локцем у твар беларуса Міхаіла Грабоўскага. Тады суддзі не заўважылі гэта парушэнне, але відэакамеры зафіксавалі выхадку бостанца, і адплата нагнала грубіяна ўжо пасля матчу, калі эпізод стаў прадметам вывучэння дысцыплінарнага камітэта.

Пасля паражэння ў першай сустрэчы (1:4) настаўнік «Таронта» Рэндзі Карлайл зрабіў некалькі перастановак. Па-за складу апынуўся абаронца Майкл Костка, які нарабіў шмат памылак і да таго ж палову папярэдняга матчу правёў са зламаным пальцам, не гуляў і Джон-Майкл Лайлз. Затое ў абароне з'явіліся Раян О`Берн і Джэйк Гардынер. У нападзенні не было Кларка Макартура і сілавога форварда Фрэйзера Макларэна, затое былі ўключаныя ў склад Раян Гамільтан і Мэт Фратэн, якія зарабілі па галявым пасе.

Галявы пас і на рахунку беларускага форварда Міхаіла Грабоўскага, які на гэты раз гуляў у другім звяне разам з расейцам Мікалаем Кулеміным і амерыканцам Джэймсам ван Рымсдайкам, які ў дзень матчу адзначае сваё 24-годдзе. І дзень нараджэння быў адзначаны не толькі перамогай яго каманды, але і закінутай шайбай, якая на 57-й хвіліне практычна перакрэсліла надзеі супернікаў на выратаванне.

Пасля гульні ван Рымсдайк асабліва падкрэсліў заслугу Грабоўскага ў гэтым узяцці брамы. Беларус, атрымаўшы пас у сваёй зоне ад Кулеміна, прамчаўся ўздоўж правага борта, а калі перасёк чужую сінюю лінію, нечакана зрушыўся на супрацьлеглы фланг, выцягнуўшы на сябе адразу двух гульцоў «Бостана», а затым зрабіў дыяганальны пас на пакінутага ў адзіноце перад брамай ван Рымсдайка. Амерыканец спачатку з ходу паспрабаваў адправіць шайбу ў мэту, знаходзячыся спіной да галкіпера, але задума не ўдалася, і тады ён закінуў, рэзка развярнуўшыся на 180 градусаў.

Міхаіл Грабоўскі правёў на лёдзе 16 мін. 56 сек. (24 змены), зарабіў 1 (0 +1) бамбардзірскі бал, выканаў 3 кідкі ў створ брамы, а яшчэ 1 - міма. Беларус таксама ўжыў 2 сілавыя прыёмы, зрабіў 1 страту, заблакаваў 3 кідкі супернікаў, выйграў 5 з 16 укідванняў і завяршыў паядынак з паказчыкам карыснасці «0».

Зараз каманды пераязджаюць на пляцоўку «кляновага ліста», дзе працягнуць барацьбу за выхад у другі раўнд. Наступныя матчы серыі, якая працягнецца да 4 перамог, запланаваныя на 6 і 8 траўня (у Таронта), на 10 траўня (у Бостане) і, калі спатрэбіцца, на 12 траўня (у Таронта) і 13 траўня (у Бостане).

Пакуль жа лік у супрацьстаянні 1:1. Калі «Таронта» не выйграе больш 1 матчу ў гэтай серыі і вылеціць з Кубка Стэнлі, то на Міхаіла Грабоўскага спадзяюцца ў зборнай Беларусі, якая гуляе ў Стакгольме на чэмпіянаце свету па хакеі.