Плошчу Таксім разагналі вадамётамі, кулямі і газам

Спецпадраздзяленні турэцкай паліцыі ўвайшлі на плошчу Таксім у Стамбуле, дзе другі тыдзень не спыняюцца пратэсты.

Паліцыянты выкарыстоўвалі слезацечны газ, вадамёты і гумовыя кулі, адганяючы дэманстрантаў з плошчы ў парк Гезі. Многія з удзельнікаў акцый пратэсту пакінулі плошчу Таксім і адступілі ў парк, у якім разбіты намётавы лагер, перадае BBC.

Улады заяўляюць, што адзінай мэтай паліцыі з'яўляецца выдаленне з плошчы сцягоў і плакатаў, якія былі прынесеныя туды дэманстрантамі за 12 дзён пратэстаў. Яны сцвярджаюць, што не збіраюцца ўрывацца ў парк, планы па ліквідацыі якога далі штуршок пратэстам.

Мінулай ноччу сутыкненні з паліцыяй адбыліся таксама ў Анкары. Урад поўны рашучасці аднавіць свой кантроль над тымі раёнамі, у якіх апазіцыя дзейнічае асабліва актыўна.

12 дзён пратэстаў

Спецназ ужыў сілу праз усяго суткі пасля таго, як прэм'ер-міністр Турцыі Рэйджэп Тайіп Эрдаган пагадзіўся ў сераду сустрэцца з лідарамі пратэстантаў у спробе вырашыць крызіс. Аднак падзеі мінулай ночы могуць сарваць гэтую сустрэчу.

На мінулым тыдні, выступаючы перад сваімі прыхільнікамі, Эрдаган папярэдзіў, што цярпенне ўрада мае мяжу, і назваў удзельнікаў акцый пратэсту марадзёрамі.

Шматтысячныя пратэсты пачаліся ў Турцыі ў ноч на 1 чэрвеня ў сувязі з планамі ўладаў пабудаваць у парку Гезі, размешчаным у цэнтральнай частцы Стамбула, гандлёва-забаўляльны комплекс.

Аднак турэцкі прэм'ер заявіў, што ўрад не мае намеру адмаўляцца ад планаў па забудове парка.

Да мірнай акцыі пратэсту, зладжанай абаронцамі парку Гезі, паступова далучыліся дэманстранты, незадаволеныя палітыкай турэцкага прэм'ера і кіруючай Партыі справядлівасці і развіцця.

За 12 дзён пратэстаў чатыры чалавекі загінулі, больш за пяць тысяч атрымалі раненні. Сотні ўдзельнікаў пратэстаў былі арыштаваныя.