«Дынама» заклікае на пасаду трэнера Роберта Маасканта

Галандзец Роберт Мааскант можа стаць 27-м галоўным трэнерам ФК «Дынама» пасля куплі каманды алігархам Чыжом.

Менскае «Дынама» працягвае пошук новага галоўнага трэнера на месца Алега Пратасава. На дадзены момант клуб вядзе перамовы з галандскім спецыялістам Робертам Мааскантам, які прыехаў у Менск. Гэтую інфармацыю пацвердзіў старшыня Назіральнага савета «Дынама» Юрый Чыж. Калі 44-гадовага трэнера задаволяць умовы, прапанаваныя сталічным клубам, пагадненне можа быць падпісанае ў бліжэйшыя дні, паведамляе «Прессбол».

У сезоне-2012/13 Роберт Мааскант прывёў «Гронінген» на 7-е месца ў чэмпіянаце Галандыі. У 2011-м годзе спецыяліст заваяваў тытул чэмпіёна Польшчы разам з «Віслай», у якой на той момант выступаў Міхаіл Сівакоў.

Раней паведамлялася пра тое, што менскае «Дынама» таксама разглядае партугальскага спецыяліста Паўлу Созу на пасаду галоўнага трэнера клуба.

Учора стала вядома, што галоўны трэнер каманды Алег Пратасаў пакідае свой пост. Кантракт настаўніка разлічаны да канца 2013 года, аднак кіраўніцтва клуба вырашыла скасаваць пагадненне датэрмінова.