П'яных кіроўцаў будуць саджаць на 10 гадоў

«Палатка» разглядае скандальны законапраект аб канфіскацыі аўто ў п'яных кіроўцаў.

У Беларусі плануюць увесці канфіскацыю аўтамабіляў за паўторнае на працягу года кіраванне транспартным сродкам у стане алкагольнага ап'янення, заявіла на прэс-канферэнцыі ў аўторак у Менску старшыня камісіі па заканадаўстве і судова-прававых пытаннях «палаты прадстаўнікоў» Людміла Міхалькова, піша «Інтэрфакс».

«Законапраект аб узмацненні мер адказнасці прадугледжвае канфіскацыю аўтамабіля пры паўторанам на працягу года выпадку кіравання транспартным сродкам у стане ап'янення», - сказала Міхалькова.

Яна таксама адзначыла, што пад прапанаваную норму законапраекта падпадаюць і юрыдычныя асобы. «І фізічныя, і юрыдычныя асобы ў гэтым выпадку знаходзяцца ў аднолькавым становішчы», - падкрэсліла дэпутат. «Гэта не супярэчыць Канстытуцыі», - дадала яна.

Міхалькова таксама паведаміла, што ў адпаведнасці з дадзеным законапраектам прапануецца павялічыць штрафы за кіраванне транспартным сродкам у стане алкагольнага ап'янення - да 100 базавых велічынь. «Цяпер максімальны штраф за такое правапарушэнне - Br3,5 млн, гэта вельмі мала, з улікам росту такіх правапарушэнняў», - сказала «дэпутат».

Яна таксама адзначыла, што распрацаваны законапраект, які знаходзіцца на разглядзе ў «палаце прадстаўнікоў», таксама прадугледжвае павелічэнне тэрмінаў пазбаўлення волі за ўчыненне ДТЗ у стане ап'янення, у якім загінулі 2 і больш чалавек, - ад 4 да 10 гадоў.

«Прыраўноўваецца да наўмыснага забойства без абцяжваючых акалічнасцяў», - удакладніла Міхалькова. Пры гэтым яна адзначыла, што раней ніжняя мяжа пакарання за ДТЗ з гібеллю людзей, здзейсненае ў стане ап'янення, была 3 гады пазбаўлення волі, цяпер жа законапраектам прапануецца прызначаць пакаранне на тэрмін не менш за 4 гады.

На пытанне аб тэрмінах прыняцця законапраекта Міхалькова адказала, што ён можа быць прыняты «і на восеньскай сесіі, і ўступіць у законную сілу праз 3 месяцы пасля апублікавання».

«Праблем з узгадненнем дадзенага законапраекта, перад тым, як ён паступіў у «парламент», не было. Ён быў узгоднены ў аўтарскай рэдакцыі», - дадала старшыня камісіі.

Нагадаем, у мінулым годзе Генеральная пракуратура Беларусі накіравала ў адміністрацыю Лукашэнкі прапановы аб узмацненні жорсткасці пакарання за кіраванне ў п'яным выглядзе. У прыватнасці, прапануецца за кіраванне аўтамабілем у нецвярозым стане паўторна на працягу года канфіскоўваць аўтамабілі. Канфіскацыю праводзіць па-за залежнасці ад таго, хто з'яўляецца ўласнікам аўтамабіля. Канфіскаваны аўтамабіль будуць звяртаць ў даход дзяржавы.