Мандат спецдакладчыка ААН па Беларусі падоўжылі на год

Рада ААН па правах чалавека падоўжыла на год мандат Міклаша Харашці.

У Жэневе адбылося галасаванне краін, якія ўваходзяць у Раду ААН па правах чалавека, па пытанні падаўжэння або спынення мандата спецдакладчыка Арганізацыі Аб'яднаных Нацый па Беларусі Міклаша Харашці.

За рэзалюцыю, якая змяшчае прапанову падоўжыць мандат Міклашу Харашці, аддалі свае галасы дэлегацыі 26 краін, супраць выступілі 3, устрымаліся 18.

Пра гэта сайту charter97.org паведамілі праваабаронцы.

Згодна з рэгламентам, лёс пытання вырашаецца простай большасцю галасоў.

Нагадаем, 4 чэрвеня Рада па правах чалавека ААН абмеркавала даклад па Беларусі, які быў падрыхтаваны спецдакладчыкам Рады ААН Міклашам Харашці і апісваў сітуацыю з правамі чалавека ў нашай краіне на працягу апошняга года.

У сваім дакладзе спецдакладчык Рады ААН адзначыў, што сітуацыя з палітвязнямі выклікае вялікую занепакоенасць.

«Умовы іх утрымання ў турмах разам з інфармацыяй аб псіхалагічным і фізічным ціску могуць быць расцэненыя як неналежнае ўтрыманне, а часам і катаванні», - заявіў ён.

Таксама ён нагадаў, што не меў магчымасці патрапіць у Беларусь з-за таго, што ўлады нашай краіны адмовіліся выдаваць яму ўязную візу.

У дакладзе Міклаша Харашці, акрамя патрабавання аб вызваленні палітвязняў, утрымліваліся і іншыя. У прыватнасці, беларускім уладам таксама было рэкамендавана прыняць меры для ліквідацыі ўсіх перашкод, якія замінаюць актыўнаму ўдзелу грамадскіх няўрадавых арганізацый і апазіцыйных партый у палітычным жыцці краіны, а таксама гарантаваць бесстаронняе прымяненне законаў на практыцы.

Акрамя таго, афіцыйнаму Менску было рэкамендавана актывізаваць работу парламенцкай групы па вывучэнні пытання смяротнага пакарання, апублікаваць вычарпальную інфармацыю аб ужо прыведзеных у выкананне прысудах і неадкладна ўвесці мараторый на смяротнае пакаранне з далейшай яго адменай.

Уладам рэкамендавалася таксама правесці расследаванне выпадкаў гвалтоўнага знікнення некалькіх беларускіх палітыкаў і грамадскіх дзеячаў, фактаў пазбаўлення ліцэнзій і пераследу адвакатаў, якія абаранялі фігурантаў справы аб масавых беспарадках у Менску 19 снежня 2010 года, гарантаваць поўную незалежнасць судовай сістэмы і суддзяў у Беларусі.

Спецдакладчык заклікаў улады гарантаваць, што ўсе затрыманыя грамадзяне будуць хутка інфармавацца пра прычыны затрымання і вылучаныя абвінавачванні, мець бесперашкодны доступ да адваката. Пры гэтым было рэкамендавана гарантаваць абсалютную забарону на катаванні і іншыя віды неналежнага абыходжання з затрыманымі.

Беларускім уладам таксама было рэкамендавана забяспечыць абарону праваабаронцаў і журналістаў ад пераследу, запалохвання і гвалту, правесці поўнае і бесстаронняе расследаванне ўсіх падобных выпадкаў.

Харашці звярнуў увагу, што пры падрыхтоўцы дакладу ў яго адбыліся сустрэчы за межамі Беларусі з прадстаўнікамі апазіцыйных партый, грамадскіх арганізацый, праваабаронцамі, журналістамі.