«Ляпісы» выступяць на адной сцэне з Papa Roach

У Варонежы пройдзе рок-фестываль з удзелам гуртоў Papa Roach і «Ляпіс Трубяцкі».

11 ліпеня ў Варонежы будзе не проста па-летняму горача. На найбуйнейшай канцэртнай пляцоўцы Event-Hall у рамках летняга пяцігадзіннага міжнароднага рок-фестывалю Rock'n'Park, які абяцае стаць штогадовым, у якасці хэдлайнера выступіць культавы каліфарнійскі гурт Papa Roach, паведамляе сайт culturavrn.ru.

Papa Roach - адзін з самых яркіх сучасных рок-гуртоў, разам з KoЯn, Limp Bizkit і Slipknot які складае «вялікую чацвёрку» ню-металу і, які аказаў велізарны ўплыў на развіццё гэтага жанру.

Іх альбом «Infest», які стаў тройчы плацінавым, літаральна падарваў музычную прастору нулявых, прынёсшы гурту сусветную вядомасць. Наступныя пласцінкі толькі падмацоўвалі поспех, заваёўваючы то залатыя, то плацінавыя ўзнагароды. За ўсю сваю кар'еру Papa Roach прадалі больш за 18 мільёнаў дыскаў!

Але ўсё ж такі моцныя альбомы - гэта толькі палова поспеху Papa Roach, а статусу суперзорак ім дапамагла дамагчыся неверагодная энергетыка жывых выступленняў.

Таксама 11 ліпеня ў Варонежы ў рамках фестывалю Rock'n'Park у канцэртнай зале Event-Hall выступіць беларускі гурт «Ляпіс Трубяцкі». Самы вядомы рок-гурт Беларусі дае канцэрты па ўсёй рускамоўнай айкумене - ад Рыгі да Новасібірска, ад Масквы да Тбілісі, і нязменна збірае аншлагі. У Варонежы гурт выканае свае лепшыя хіты і песні з новага альбома «Рабкор», які выйшаў 1 траўня 2012 года.

У пачатку нулявых «Ляпіс Трубяцкі» лічыўся, хутчэй, поп-камандай - але ў 2007 годзе ў свядомасці яе лідара адбылася рэвалюцыя. Сяргей Міхалок перагледзеў свае погляды на жыццё, радыкальна змяніўся сам і да непазнавальнасці змяніў творчасць сваёй групы: зараз «Ляпісы» знаходзяцца ў авангардзе рок-альтэрнатывы. Іх канцэрты - гэта заўсёды нястрымны драйв, мора весялосці і пазітыву.