Вікторыя Азаранка: Мне нецікава, хто выйграе Roland Garros

Беларуская тэнісістка не збіраецца затрымлівацца ў Парыжы.

Вікторыя Азаранка, якая ў трох сэтах прайграла Марыі Шарапавай у паўфінале Roland Garros, сказала, што ёй не цікава, хто выйграе турнір, піша «Спорт-экспресс».

- Дазволіце сабе хоць бы на адзін дзень затрымацца ў Парыжы?

- Асабліва доўга затрымлівацца тут не буду. Лічу, што правяла ў гэтым горадзе дастаткова часу. Мне хочацца сканцэнтравацца ўжо на наступных турнірах, таму што Адкрыты чэмпіянат Францыі для мяне завершаны. Як у прынцыпе і ўвесь грунтавы сезон. Так што глядзець назад ужо няма сэнсу, трэба думаць толькі пра тое, што будзе наперадзе. Наступны турнір для мяне Уімблдон. Ні на якіх іншых спаборніцтвах на траве я да гэтага не згуляю.

- А хто пераможа ў фінале Roland Garros рызыкнеце выказаць здагадку?

- Калі шчыра, то я не ведаю. І мне гэта нецікава. Шанцы ёсць ва ўсіх, таму што ў сетцы засталіся толькі гульцы высокага класа. Маша выйгравала гэты турнір у мінулым годзе, а Серэна пакуль не прайграе на грунце.

Тэнісістка адзначыла, што на яе ўчарашні пройгрыш Марыі Шарапавай паўплывала непагадзь.

- Пазітыўныя моманты ад турніру, які завяршыўся для мяне, усё ж ёсць, - адзначыла Азаранка. - Усё-такі гэта быў мой першы паўфінал тут. Вядома ж, я засмучаная зыходам матчу з Шарапавай. Ну, а хто б не засмуціўся? Але ў мяне ёсць прагрэс у гульні на грунце і гэта галоўнае. Так што матывацыя працаваць далей - прысутнічае. Што тычыцца сённяшняй сустрэчы, то яе дынаміка пастаянна змянялася. А гэта з'яўляецца адным з галоўных фактараў на грунтавым пакрыцці. Спачатку перавага была ў Марыі, а ў другім сэце - у мяне. У трэцяй партыі маятнік, гайдаўся туды-сюды, і ў вырашальныя моманты Шарапава згуляла лепш. А я дапусціла больш памылак, чым суперніца.

- Дождж, які пачаўся як раз пасля другога сэта, які завяршыўся ў вашу карысць, сыграў у выніку ў чыю-небудзь карысць?

- Не ведаю, у чый бок ён сыграў, але тое, што сыграў - гэта дакладна. Я не скажу, што менавіта з-за гэтага прайграла матч, але пэўную ролю непагадзь згуляла.

- Многія адзначаюць, што вы пакуль не так добра рухаецеся па корце, як да траўмы, якая мучыла вас пасля Australian Open.

- Я не пагаджуся з гэтым. У мінулым годзе на грунце я перасоўвалася нашмат горш. У прынцыпе на гэтую тэму мне больш няма чаго дадаць.

Нагадаем, учора ў паўфінальным матчы Адкрытага чэмпіянату Францыі па тэнісе Вікторыя Азаранка ў трох сэтах прайграла расеянцы Марыі Шарапавай - 1:6, 6:2, 4:6.

Раней на турніры беларуска, якая з'яўляецца трэцяй ракеткай свету, перамагла расеянку Алену Весніну (38) - 6:1, 6:4, немку Аніку Бек (62) - 6:4, 6:3, францужанку Алізі Карнэ (27) - 4 : 6, 6:3, 6:1, італьянку Франчэску Ск'явоне - 6:3, 6:0 і расеянку Марыю Кірыленка - 7:6, 6:2.

Для беларускай тэнісісткі цяперашні турнір у Парыжы 8-ы па ліку, а яе лепшым вынікам з'яўляецца выхад у чвэрцьфінал у 2009 і 2011 гадах. У гэтым сезоне Вікторыя Азаранка выйграла першы турнір «Вялікага шлема» - адкрыты чэмпіянат Аўстраліі, а затым перамагла на турніры ў Дохе. Усяго ў яе прафесійнай кар'еры 16 чэмпіёнскіх тытулаў пад эгідай WTA.

Спаборніцтвы ў Парыжы, агульны прызавы фонд якіх складае 22 млн. еўра, завершацца 9 чэрвеня.