Расейскія журналісты нахамілі міністру культуры Беларусі
209- 11.07.2013, 22:03
- 102,677
Журналістаў расейскіх СМІ абурыла выступленне Барыса Святлова на беларускай мове.
Гэта адбылося сёння на прэс-канферэнцыі, прысвечанай адкрыццю фестывалю «Славянскі базар» у Віцебску. Міністр культуры звярнуўся да прысутных з уступным словам па-беларуску.
«Фэст «Славянскі базар у Віцебску» стаў сусветным брэндам, які вабіць тысячы артыстаў, прыхільнікаў, турыстаў з розных краін, прадстаўнікоў СМІ, усіх, хто цікавіцца музычнай культурай», - падкрэсліў Барыс Святлоў. Ён таксама адзначыў, што за мінулыя гады на форуме мастацтваў у Віцебску пабывалі дзясяткі тысяч лепшых прадстаўнікоў культуры розных краін, а сам фестываль ператварыўся ў безумоўны сімвал яднання славянскіх ды іншых культур на аснове гуманістычных ідэй міру, дабра і стварэння, паведамляе БелТА.
Адразу пасля заканчэння выступу беларускага міністра культуры з першых шэрагаў пачуліся незадаволеныя заўвагі, піша «Наша Нiва».
«А цяпер перакладзіце нам тое, што вы сказалі», - запатрабавала адна з прысутных.
«Мы тут не лішнія, па-першае», - сказала другая.
Барыс Святлоў пастараўся закасаваць інцыдэнт і перайшоў на расейскую мову. На ёй ён адказваў і на пытанні, якія задавалі яму ўдзельнікі прэс-канферэнцыі.
Нагадаем, «Славянскі базар» у гэтым годзе змяніў свой фармат. Арганізатары адмовіліся ад шэрагу мерапрыемстваў і скарацілі працягласць фестывалю.