«Камуналка» і бензін падаражэюць услед за прадуктамі

Падаражэнне прадуктаў харчавання - першая ластаўка ў чарадзе росту коштаў.

У бліжэйшы час беларусаў чакае падаражанне камуналкі і бензіну. Пра рост коштаў на паслугі ЖКГ папярэджвае міністр Андрэй Шарэц у інтэрв'ю «Народной газете».

«Улічваючы, што ўзровень тарыфаў на паслугі ЖКГ аказвае істотны ўплыў на ўзровень жыцця насельніцтва, іх павышэнне плануецца рабіць паэтапна, ва ўвязцы з ростам даходаў насельніцтва і адначасовым аказаннем найменш абароненым яго групам дзяржаўнай адраснай сацыяльнай дапамогі для аплаты гэтых паслуг», - кажа ён.

Пра тое, што фармальны рост даходаў насельніцтва ўлады выкарыстоўваюць для павышэння коштаў кажа і эканамічны эксперт Антон Балточка. У інтэрв'ю БелаПАН ён заявіў, што ў рэжыме ручнога кіравання ўлады не ўкладуцца ў прагнозныя паказчыкі інфляцыі. На думку эксперта, па выніках года рост коштаў можа скласці каля 15%. За першае паўгоддзе інфляцыя, па афіцыйных дадзеных, ужо складае 7%.

Прадукты харчавання сталі першай ластаўкай у чарадзе павелічэння коштаў, таму што менавіта на гэтыя тавары яны даўно не падымаліся, адзначае Балточка. Далей, лічыць эканаміст, варта чакаць павелічэння коштаў на паслугі ЖКГ, якія часта падымаюцца летам, так як для насельніцтва гэта менш прыкметна, чым зімой, і на паліва.

Пра маючы адбыцца рост коштаў на бензін сведчыць павышэнне акцызных ставак, якое ініцыюе Міністэрства фінансаў. Беларускія НПЗ таксама разлічваюць на павышэнне рознічных коштаў на бензін і дызельнае паліва.

«Міністэрства фінансаў, матывуючы сваю пазіцыю неабходнасцю павелічэння даходаў бюджэту, выступіла з ініцыятывай павышэння ставак акцызаў на паліва. Калі гэта прапанова будзе падтрымана на ўзроўні ўрада, беларускія НПЗ разлічваюць, што іх інтарэсы будуць улічаныя», - паведаміў некалькі дзён таму крыніца ў нафтаперапрацоўчай галіны.

Паводле яго слоў, Мінфін ініцыюе павышэнне ставак акцызаў на аўтабензіны на 20% ад цяпер дзеючых, на дызпаліва - прыкладна на 33-35%.