27-гадовы «газавы» алігарх здзіўляе Украіну

Яшчэ некалькі месяцаў таму назад ніхто не чуў пра Сяргея Курчанку.

Імёны і ролі ўсіх украінскіх алігархаў былі больш-менш вядомыя, піша Герхард Гнаўк на старонках нямецкага выдання Die Welt. Ды і з'яўленне ў вышэйшай лізе ўкраінскага бізнесу 27-гадовага вельмі заможнага «пачаткоўца» ніхто б не заўважыў, калі б той не купіў другі па велічыні на Украіне мультымедыяхолдынг Ukrainian Media Holding (UMH).

У выніку, падкрэслівае аўтар, свайго ўладальніка змяніў паспяховы ўкраінскі часопіс «Корреспондент» і ўкраінская версія часопіса Forbes. Аж да цяперашняга часу, адзначае выданне, «Корреспондент" быў вядомы сваёй крытычнай пазіцыяй у адносінах да таго, што адбываецца ў краіне пад уладай усё больш аўтарытарнага прэзыдэнта Януковіча. «Цікава, ці працягнецца гэтая традыцыя ў будучыні?» - задаецца пытаннем аўтар.

Пакуль што, гаворыцца ў матэрыяле, пра ўраджэнца Харкава Курчанку вядома толькі тое, што ён з'яўляецца ўладальнікам ФК «Металіст», які прэтэндуе на трэцяе месца ў агульным камандным заліку, і што ён займаецца продажам прыроднага газу. Кампанія ВЕТЭК, заснавальнікам і старшынёй назіральнага савета якой і з'яўляецца Курчанка, сцвярджае, што «кантралюе ад 25 да 30% усяго газавага рынку краіны» і збіраецца да канца года «дасягнуць такіх жа вынікаў у нафтавым бізнесе». Зусім нядаўна ўкраінец купіў у расейскага «Лукойла» адэскі НПЗ і сетку газавых АЗС у Германіі.

Пры ўсім гэтым, працягвае Гнаўк, паходжанне грошай Курчанкі невядома. Што тычыцца набытых ім выданняў, то прадпрымальнік не збіраецца ўмешвацца ў іх дзейнасць, сцвярджаючы, што «бізнес ёсць бізнес, (...) галоўнае, каб ён прыносіў прыбытак». Праўда, палітолаг Вадзім Карасёў лічыць, што «СМІ - гэта зусім не той бізнес, з дапамогай якога можна зарабляць грошы»: «Іх аддача заключаецца ў іншым - яны з'яўляюцца палітычным рычагом».

Курчанку ж, у сваю чаргу, многія назіральнікі адносяць да так званай «сям'і» - кола набліжаных прэзідэнта Януковіча і яго сына Аляксандра, які разбагацеў у адно імгненне. Як вядома, папулярнасць Януковіча сур'ёзна ўпала, і, адпаведна, зменшыліся яго шанцы на перавыбранне ў 2015 годзе. Таму, канстатуе аўтар, «змены, якія адбываюцца ва ўкраінскай медыясферы могуць быць звязаныя менавіта з гэтым».

Дарэчы, дадае Die Welt, у красавіку свайго ўладальніка памяняў самы крытычна настроены ўкраінскі тэлеканал TVi, у выніку чаго было звольнена больш 30 журналістаў. Яшчэ адной нечаканасцю ў медыясферы Украіны стала газета «Вести», якая бясплатна распаўсюджваецца ў пяці ўкраінскіх гарадах-мільённіках. У хуткім часе ў выдання з'явіцца ўласны тэлевізійны канал. «Хто ўсё гэта фінансуе, невядома, аднак шмат хто лічыць, што спонсары знаходзяцца ў Расеі», - піша Гнаўк.

Пераклад: Inopressa.ru