Лукашэнка: РПЦ дапамагае інтэграцыйным працэсам

Беларускі кіраўнік адзначае «асаблівую ролю Рускай праваслаўнай царквы ў падтрыманні міру і згоды ў грамадстве».

Пра гэта ён заявіў сёння на сустрэчы з Патрыярхам Маскоўскім і ўсяе Русі Кірылам і кіраўнікамі памесных праваслаўных цэркваў, перадае БелТА.

На яго думку, канструктыўная пазіцыя Рускай праваслаўнай царквы дапамагае грамадзянам захоўваць вернасць адзіным гістарычным караням і добрым запаветам продкаў. «Гэта з'яўляецца магутнай запамогай тым інтэграцыйным працэсам, якія развіваюцца на постсавецкай прасторы, - адзначыў ён. - Адзіная вера, якая ляжыць у аснове славянскіх культур, збліжае нас і робіць зразумелымі адзін аднаму. Ніякія межы не ў сілах падзяліць то глыбокае адзінства, якое вырастае з нашай гісторыі».

Лукашэнка падкрэсліў, што беларускі народ свята шануе і захоўвае веру продкаў на працягу стагоддзяў, колькасць вернікаў у краіне пастаянна ўзрастае.

Кіраўнік падзякаваў Патрыярха Кірыла і прадстаяцеляў памесных праваслаўных цэркваў за іх ініцыятыву завяршыць урачыстыя мерапрыемствы ў гонар юбілейнай даты Хрышчэння Русі ў беларускай сталіцы.

Лукашэнка адзначыў, што ўпершыню ў гісторыі ў Беларусі сустракаюць кіраўнікоў і прадстаўнікоў усіх памесных праваслаўных цэркваў. «І тое, што высокія іерархі разам з нашым народам святкуюць вялікую гістарычную дату, сведчыць пра вялікую ролю праваслаўнай духоўнасці ў жыцці беларусаў», - лічыць ён.

Нагадаем, на ўрачыстасці, прысвечаныя 1025-годдзю хрышчэння Кіеўскай Русі, якія праходзілі сёння ў цэнтры Менска, Лукашэнка не з'явіўся.