«Мэтавікі» будуць адпрацоўваць пасля ВНУ 6 гадоў?

Пытанне аб павелічэнні абавязковага тэрміну работы па размеркаванні для выпускнікоў ВНУ з двух да трох гадоў пакуль не разглядаецца.

Аб гэтым заявіў старшыня «савета рэспублікі» Анатоль Рубінаў. Сёння ён прымае ўдзел у выязным пасяджэнні Савета аб узаемадзеянні органаў мясцовага самакіравання пры «савеце рэспублікі» ў Мазырскім раёне, паведамляе БелТА.

«Па-іншаму можа быць, напрыклад, з «мэтавікамі», гэта значыць тымі, хто скончыў навучальную ўстанову па мэтавым наборы і размяркоўваецца ў сельскую мясцовасць. Я прыхільнік таго, каб шырэй выкарыстоўваць мэтавае накіраванне на вучобу, і тэрмін працы такога маладога спецыяліста можа быць павялічаны, напрыклад, да 6 гадоў. Але з адной умовай: моладзі павінны выдзяляцца жыллё, адпаведны заробак і г.д. Няхай чалавек вернецца ў сваё сяло, ажэніцца, і калі ў яго тут будуць усе ўмовы для жыцця, то, вядома, ён застанецца», - выказаўся старшыня «савета рэспублікі».

«Мы павінны дапамагаць замацоўвацца маладым кадрам, і тады сяло будзе жыць. Бо і ў малых гарадах можа быць больш лепшае жыццё, магчымасці, і мы гэта бачым на прыкладзе Мазырскага раёна, дзе створаныя належныя ўмовы для жыцця людзей», - дадаў Анатоль Рубінаў.