Махляры за ноч абакралі кліента Velcom на тры мільёны

За адну ноч рахунак карыстальніка тэлефоннага аператара паменшыўся на 3.300.000 беларускіх рублёў.

Аб сітуацыі, у якую ён трапіў, распавёў кліент Velcom Кірыл на форуме тэлеканала СТВ.

«Мне 18 гадоў, студэнт, грошай лішніх няма са стыпендыяй у 700 тысяч рублёў у месяц. Сітуацыя наступная - 2013/07/26 я прачнуўся ў 10 гадзін раніцы, узяў тэлефон і ўбачыў, што прыйшла смс ад velcom, аб запазычанасці на рахунку. Я здзівіўся, бо толькі ўчора «кідаў» грошы на рахунак. Я вырашыў даведацца, у чым справа. Правяраю баланс і ў мяне пачынаецца паніка, вялікіх даўгоў у мяне ніколі не было, а пра такія я і не кажу... На балансе прыблізна мінус 3300000 рублёў.

Я ў шоку набіраю нумар 411 і спрабую даведацца, адкуль у мяне такая запазычанасць. Дзяўчына, з якой я размаўляў, распавяла, што ў мяне доўг праз перарасход інтэрнэт-трафіку ў памеры 14307 Мб. Кажа, што я за гэтыя суткі столькі скарыстаў. Але за суткі такі аб’ём у прынцыпе праседзець нельга. У мяне тарыф смарт 500 (хто не ведае - 500 Мб трафіку). Я гэтых 500 Мб ніколі не скарыстоўваў нават. І на момант 2013/07/25 прыблізна ў 21:00 у мяне яшчэ было 100 Мб. Ды і дома ў мяне інтэрнэт без абмежаванняў. Я ўзяў раздрукоўку з 2013/07/20 па 2013/07/26. І што мяне здзівіла: з 2013/07/25 23:31:49 пачаў «з’ядацца» трафік (спачатку бясплатны круціў, а далей за грошы). Я на гэты момант ужо спаў, а тэлефон ціхенька адпачываў у баку. Трафік «з'ядаўся» па 32 Мб у некалькі хвілін (да гэтага здымалася па 0,5 Мб за падключэнне, дзе менш, а дзе крыху болей) і так да 2013/07/26 09:16:24 (4 лісты раздрукоўкі, а там усяго 5). І за гэты трафік 2736195 рублёў і + 20% ПДВ.

Я пайшоў у сэрвісны цэнтр Velcom і распавёў аб сваёй праблеме, на што дзяўчына мне сказала,што, магчыма, ў вас абнаўляліся праграмы на тэлефоне. Яна, напэўна, меркавала, што я наогул ідыёт. Усё ПА, нават калі і абнаўлялася б, то Мб 200 не больш, але не 14 000. І іншыя прычыны пачала прыдумляць», напісаў ён.

Аб падобных выпадках кліенты беларускіх аператараў сотавай сувязі паведамлялі і раней.