Перадзел уласнасці ў ГЦ «Ждановічы»

Новы ўладальнік гандлёва-забаўляльнага цэнтра «Град» у Ждановічах паспешліва скасоўвае дамовы з арандатарамі без іх ведама.

Пра гэта сайту charter97.org паведаміў чытач.

«Старшыня праўлення гандлёвага цэнтра «Ждановічы» Яўген Шыгалаў зноў замятае сляды і «хімічыць» з дакументамі. У ТРЦ «Град» нібыта памяняўся ўласнік. Арандатараў падставілі па поўнай праграме. Пра скасаванне дамовы іх апавясцілі ўсяго толькі ў сярэдзіне жніўня і далі тэрмін перааформіць дамовы да канца месяца. Многія людзі ў адпачынках і не ў курсе таго, што адбываецца. Адміністрацыя «Граду» скасоўвае дамовы без арандатараў і заключае новыя ці ледзь не з першымі сустрэчнымі», - піша чытач.

Карэспандэнту charter97.org у гандлёва-забаўляльным цэнтры «Град» дадзеную інфармацыю ўскосна пацвердзілі.

«Інфармацыя аб уласніку з'яўляецца канфідэнцыяльнай. Што тычыцца скасавання дамоваў, то мы паведамляем пра гэта за тыдзень, паводле гэтай жа дамовы. Арандатарам прадастаўляецца права пераскладання дамовы», - паведамілі ў камерцыйным аддзеле ТРЦ «Град».

Па словах старшыні грамадскага аб'яднання «Перспектыва» Анатоля Шумчанкі, перадзел уласнасці ў дадзеным гандлёва-забаўляльным цэнтры сапраўды мае месца.

«Справа ў тым, што па маёй інфармацыі, яго прадалі БПС-Банку, і новы ўласнік спрабуе цяпер устанавіць новыя правілы гульні. А яшчэ ёсць інфармацыя, што рынак у Ждановічах прадаецца па частках. Яна неафіцыйная і неправераная, але так, па меншай меры, кажуць людзі. Наогул, дамовы з арандатарамі там бестэрміновыя, і па законе ім павінны паведаміць пра скасаванне за тры месяцы. Але яны цалкам мяняюць ўмовы дамовы і хочуць выключыць субарандатараў, гэта значыць прыходзяць да людзей і пытаюцца, хто яны. Калі субарандатары, то кажуць: «Мы з уладальнікамі скасоўваем дамову, а вы будзеце арандатарам». І атрымліваецца, што людзі застаюцца без сваіх крам, якія яны некалі куплялі. Бо была старая адміністрацыя, якая ўжо зарабіла на прадпрымальніках, а зараз прыйшла новая, якая таксама хоча зарабіць і ўкараняе свае правілы гульні», - падкрэсліў прадпрымальнік.