Аляксандр Ярашук: Агмені АЧС у Беларусі існуюць ужо тры гады

Агмені Афрыканскай чумы свіней (АЧС) у Беларусі былі выяўленыя яшчэ тры гады таму.

Не выключана, што эпідэмія АЧС - гэта вынік канкурэнтнай барацьбы паміж дзяржавамі.

«Улады прымаюць неадэкватныя меры, знішчаючы ўсё свінапагалоўе ў сялян», - лідар БКДП Аляксандр Ярашук, які больш за 30 гадоў прапрацаваў у сельскай гаспадарцы, лічыць дзеянні кіраўніцтва Віцебскай вобласці неадэкватнымі.

Як вядома, 7 раёнаў Віцебскай вобласці вакол ачага (філіял ААТ «Лучоса» ў аграгарадку Копці побач з Віцебскам) прызнаныя неспрыяльнымі зонамі па афрыканскай чуме свіней, дзе ўсіх не забітых насельніцтвам свіней тут будуць адбіраць. Астатнія раёны па ўсёй вобласці абвешчаныя буфернымі зонамі па АЧС, дзе рэкамендуюць выразаць усіх свіней у падсобных гаспадарках.

Якім чынам эпідэмія АЧС звязаная з беларуска-расейскімі адносінамі? Пра гэта «Белорусско-российским новостям»» распавёў лідар БКДП Аляксандр Ярашук.

- Спецыялісты сцвярджаюць, што агмені афрыканскай чумы свіней у Беларусі існуюць ужо тры гады! Адзін гэты факт спараджае шмат пытанняў, галоўны з іх - гульня ў маўчанку, якая з'яўляецца характарыстыкай сістэмы ўлады ў краіне. Калі б улада з самага пачатку не хавала наяўнасць АЧС, магчыма, удалося б пазбегнуць такіх негатыўных наступстваў, і перш за ўсё - для насельніцтва Беларусі.

Няма ніякіх прэтэнзій да работнікаў ветэрынарных службаў - многіх ведаю па 20-30 гадоў, і мае нядаўнія кантакты пацвердзілі іх прафесіяналізм. Сігналы трывогі яны падавалі яшчэ тры гады таму, але, на жаль, не яны прымаюць рашэнне. Недавер да беларускага кіраўніцтва прывёў да таго, што Літва, Польшча гатовыя прыняць такія экзатычныя рашэнні, як узводзіць сцены на мяжы з Беларуссю. Гэта больш прапагандысцкая акцыя, таму што выключыць магчымасць пранікнення інфекцыі такім чынам нельга. Можна паменшыць, але цалкам выключыць немагчыма.

Што на самой справе адбываецца? Нельга выключаць, што мы з'яўляемся сведкамі, што паказаў прыклад «Уралкалію», жорсткай барацьбы, барацьбы без правілаў паміж канкурэнтамі. Дарэчы, і пра гэта мне казалі людзі, якія валодаюць інфармацыяй.

- Вайна дзяржавы супраць прыватнікаў, супраць сялян?

- У тым ліку - дзяржавы супраць дзяржавы. Я не буду развіваць гэтую тэму. Шмат меркаванняў існуе, чаму «Уралкалій» прыняў беспрэцэдэнтнае рашэнне і парваў з БКК; гэта барацьба канкурэнтаў, але беларускі бок павёў сябе безадказна. Запасы «Уралкалію» ў дзесяткі разоў перавышаюць запасы «Беларуськалію», пра што беларускі бок ведаў, роўна як валодаў інфармацыяй пра тое, што на «Уралкалію» сабекошт тоны ўгнаенняў, якія здабываюцца, складае 62 даляры, у нас - больш за 100. У іх глыбіня залягання - 90-120 метраў, у нас - ад 400 да 1000 метраў. У гэтай сітуацыі дазволіць сабе прымаць правакацыйныя рашэнні - весці гандаль у абыход БКК і не пралічваць магчымых наступстваў... Гаворка ідзе пра звыклае кідалава, якое мела месца з «растваральнікамі». Або з пастаўкамі на расейскі рынак малочнай прадукцыі, калі беларусы прадаюць малака больш, чым вырабляюць, у выніку чаго зноў замаячыла перспектыва новай малочнай вайны. Гэта ж тычыцца мяса, а ў былыя гады - цукру. Любая авантура рана ці позна сканчаецца і бумерангам б'е па авантурысце.

- Значыць, гэта праўда, што дзяржава спекулюе на таварах з трэціх краін?

- Факты гэтыя агульнавядомыя і не з'яўляюцца сакрэтам: мяса і малочныя прадукты завозяцца з краін ЕЗ, у прыватнасці, з Польшчы, і наўпрост рээкспартуецца з Расею. У былыя гады гэта адбывалася з цукрам з кубінскага трыснёгу, дадамо сюды мытны разбой. Змоўчым аб эканамічным выйгрышы - якім бы ён ні быў, ён несувымерны з іміджавымі стратамі, якія нясе дзяржава, якая дазваляе сабе тое, што не можа дазволіць сабе ні адзін бізнесмен, які даражыць сваёй рэпутацыяй. Тым больш дзяржава.

Можна меркаваць (пра гэта мне таксама сказалі), што Афрыканская чума свіней (АЧС) - вынік барацьбы канкурэнтаў. Я не буду паглыбляцца далей у тэму. Калі ўвесь свет панікаваў з-за птушынага грыпу, эксперты казалі аб казачных прыбытках, якія атрымлівалі фармакалагічныя кампаніі. Усе гэтыя рэчы і кіруюцца, і скіроўваюцца. Вельмі шкада, што ў канчатковым выніку працаваць прыходзіцца простаму беларускаму селяніну, напасці на якога звалілася немаведама адкуль і ў самы непадыходны момант. Насуперак сталым і бадзёрым заявам беларускай прапаганды, якая ўзмоцнена выпінае шчаслівае жыццё беларускага сялянства, трубіць пра адраджэнне вёскі. Мы ведаем, што адраджэннем называецца выбудоўванне пацёмкінскіх вёсак. А асноўная маса сялянства, як і 20 гадоў таму, выжывае сваёй працай. І чым далей - тым цяжэй выжыванне даецца. АЧС вельмі ўскладніць становішча сялянства.

Я не збіраюся даваць ацэнак рашэнням кіраўніцтва Віцебскай вобласці, якім могуць рушыць услед іншыя рэгіёны. Але гэтыя рашэнні цалкам у духу недэмакратычнай аўтарытарнай сістэмы ўлады і выцякаюць з яе логікі: для лячэння галаўнога болю абіраецца найпросты спосаб - гільяціна. Няма свінапагалоўя на сялянскім падворку - няма праблем для ўлады, ёй можна рапартаваць пра поўную перамогу над афрыканскай чумой. Я лічу гэта неадэкватнай і неапраўданай мерай, сістэма ўлады ў чарговы раз паказала сваю неэфектыўнасць і няздольнасць вырашаць складаныя праблемы, яна вядзе краіну да банкруцтва, а яе народ - да шматлікіх бед і няшчасцяў.

- Чуме прасцей пракрасціся на свінаферму, дзе знаходзяцца дзесяткі тысяч свіней, чым на прыватны падворак з парай-тройкай свіней...

- На буйных свінафермах дзейнічае вельмі эфектыўная сістэма прафілактыкі. Але вы маеце рацыю - гэта тое ж самае, што Літва з Польшчай збіраюцца выбудоўваць плот на беларускай мяжы: што абнесці ўсю краіну плотам і калючым дротам у дадатак, што асобна ўзятую ферму - няма ніякай гарантыі, што чума туды не пракрадзецца.

З майго пункту гледжання, патрэбы ў такіх радыкальных мерах як знішчэнне свінапагалоўя ў сялян, няма. Варта толькі пашкадаваць беларускае сялянства, над якім праводзіцца такі жорсткі эксперымент. Яно як ніхто іншы доўгія гады падтрымлівала ўладу, якая спаўна адказала яму сваёй «падзякай» за падтрымку, выразаючы пад корань свіней. А што кабанчык значыць для беларускага мужыка, для сельскага ўкладу жыцця, нікому распавядаць не трэба.