Вярхоўны суд адмовіў «Гавары праўду!»

Вярхоўны суд Беларусі не задаволіў скаргу прадстаўнікоў кампаніі «Гавары праўду!» на адмову Міністэрства юстыцыі ў рэгістрацыі грамадскага аб'яднання.

Адпаведнае рашэнне агучыла 7 жніўня суддзя Валянціна Кулік. Адмову ў рэгістрацыі Мінюст аргументаваў двума парушэннямі, якія «носяць неадольны характар», піша БелаПАН.

У якасці аднаго з парушэнняў Мінюст звярнуў увагу на пратэрмінаваны гарантыйны ліст аб прадастаўленні юрыдычнага адрасу. Аднак, як сцвярджаюць прадстаўнікі кампаніі «Гавары праўду!», на момант падачы дакументаў у міністэрства (8 траўня) гарантыйны ліст быў сапраўдным. «Тэрмін яго дзеяння заканчваўся 31 траўня, і Мінюст цягнуў з адказам да апошняга, а потым заявіў, што зараз у нас няма юрыдычнага адрасу. Але мы ў любы момант маглі б прынесці новы гарантыйны ліст», - заявіў актывіст кампаніі Сяргей Вазняк.

Другое, з пункту гледжання чыноўнікаў, парушэнне Вазняк назваў «проста глупствам». «У Мінюсце сцвярджаюць, што ў нас не вызначаны колькасны склад праўлення. Але ён у нас вызначаны ў складзе пяці чалавек, былі пералічаныя прозвішчы. Тут наогул няма парушэнняў», - падкрэсліў ён.

Устаноўчы сход «Гавары праўду!» адбыўся 13 красавіка ў Менску. У ім прынялі ўдзел каля 60 дэлегатаў з Менска і абласцей Беларусі. Старшынёй арганізацыі абраны лідар грамадзянскай кампаніі «Гавары праўду!», кандыдат у прэзідэнты на выбарах 2010 года паэт Уладзімір Някляеў, яго намеснікам - Андрэй Дзмітрыеў.

Мэтай аб'яднання з'яўляецца «садзейнічанне пабудове ў Беларусі дэмакратычнай прававой сацыяльнай дзяржавы, развіццю грамадзянскай супольнасці, народнай гаспадаркі, умацаванню патрыятычных традыцый беларускага народа».

Гэта была ўжо трэцяя спроба грамадзянскай кампаніі «Гавары праўду!» прайсці афіцыйную рэгістрацыю.

Першы ўстаноўчы сход рэспубліканскай даследча-асветніцкай установы «Гавары праўду!» прайшоў у канцы лістапада 2010 года, другое - у чэрвені 2011-га.

Першы раз у рэгістрацыі было адмоўлена ў сувязі з тым, што заснавальнікі ГА не падалі дадаткова запытаныя матэрыялы. Аднак матэрыялы не маглі быць прадастаўленыя па аб'ектыўнай прычыне - яны знаходзіліся ў офісе кампаніі, які на той момант быў апячатаны пасля прэзідэнцкіх выбараў 19 снежня і наступных арыштаў актывістаў «Гавары праўду!».

Другі раз у рэгістрацыі было адмоўлена з-за таго, што заснавальнікі павінны былі падаць не толькі гарантыйны ліст аб прадастаўленні «Гавары праўду!» юрыдычнага адрасу (такі ліст у Мінюст быў перададзены разам з іншымі дакументамі), але і дакументы, якія пацвярджаюць права ўласнасці на гэта памяшканне.