Мясніковіч знайшоў крайніх
39- 7.08.2013, 13:55
- 25,124
Прэм'ер-міністр абвінаваціў падначаленых у правале найважнейшых параметраў сацыяльна-эканамічнага развіцця краіны ў першым паўгоддзі.
Пра гэта было заяўлена 6 жніўня на пасяджэнні Савета Міністраў, перадае БелТА.
Міхаіл Мясніковіч спыніўся на праблемных пытаннях развіцця галін эканомікі і шляхах іх вырашэння, даў ацэнку эфектыўнасці работы асобных міністэрстваў, ведамстваў і аблвыканкамаў.
Міністэрства прамысловасці Беларусі падвергнулася крытыцы за падзенне экспарту і аб'ёмаў вытворчасці нароўні з ростам дэбіторскай і крэдыторскай запазычанасці прадпрыемстваў. Міністэрства недастаткова эфектыўна вырашае праблемы разгрузкі складскіх запасаў. Не выконваюцца заданні па прыцягненню прамых замежных інвестыцый. Міхаіл Мясніковіч адзначыў, што ўрад не можа далей мірыцца з такой бездапаможнасцю Мінпрама, і прапанаваў прыняць адпаведныя кадравыя рашэнні.
Крытыка прагучала і ў адрас канцэрнаў. У прыватнасці, адзначаная нездавальняючая праца канцэрна «Белнафтахім» у частцы прыцягнення інвестыцый, пытанняў развіцця асобных арганізацый і галіны ў цэлым.
Прэм'ер-міністр спыніўся на праблемных пытаннях развіцця прадпрыемстваў канцэрна «Беллегпрам». Акрамя дапушчанага спаду вытворчасці, невыканання заданняў па інвестыцыях, з-за неарганізаванасці і недастатковага прафесіяналізму кіраўніцтва і апарата канцэрна не забяспечанае стварэнне гарбарна-абутковых і трыкатажнага холдынгаў. Не выкананае даручэнне і па развіцці тавараправоднай сеткі арганізацый канцэрна.
Больш эфектыўнай працы ўрад чакае і ад аграпрамысловага комплексу. За 2,5 года бягучай пяцігодкі ў АПК укладзена $5 млрд. інвестыцый. Аднак належнай аддачы як па валавых, так і па паказчыках эфектыўнасці галіны няма. Кіраўнік урада запатрабаваў надаць асаблівую ўвагу праблемам малочнай жывёлагадоўлі - фармаванню прадуктыўнага статка, паляпшэнню якасці кармоў для буйной рагатай жывёлы. Акрамя гэтага, прэм'ер-міністр прапанаваў у праекце прагнозу сацыяльна-эканамічнага развіцця Беларусі на 2014 год ўнесці змены ў фінансавы механізм падтрымкі АПК і даплочваць за рэалізаваную прадукцыю. Была таксама пастаўленая задача нарасціць глыбокую прамперапрацоўку сельгаспрадукцыі. На працягу 2014-2015 гадоў Мінсельгасхарчу і канцэрну «Белдзяржхарчпрам» даручана вырашыць гэтае пытанне.
Прэм'ер-міністр заклікаў дзяржорганы выправіць недахопы ў працы, а таксама прыняць актыўны ўдзел у падрыхтоўцы праекта прагнозу сацыяльна-эканамічнага развіцця на 2014 год. «Усе паказчыкі развіцця павінны быць адказна прапрацаваныя», - рэзюмаваў ён.