«Scotsman»: Гульца «Менска» выдалілі за падколкі ў адрас супернікаў

Сяргей Сасноўскі быў выдалены з поля за падколкі ў адрас гаспадароў, якія саступілі.

Шатландскае выданне «Scotsman» падзялілася ўражаннямі ад паразы «Сэнт-Джонстана» ў паядынку ў адказ з «Менскам» (0:1, 2:3-пен.), піша «Прессбол».

«Сэнт-Джонстан» развітаўся з 42-гадовай бяспройгрышнай серыяй у еўракубках. Узяўшы верх у серыі пенальці, «Менск» паклаў канец надзеям «святых» у Лізе Еўропы. «Гамбург», «Жалезнічар», «Манака», «Русенборг» - нікому з іх не ўдалося адолець нашу каманду на яе полі з 1971 года, калі яна ўпершыню выступіла ў Кубку УЕФА. Аднак упартыя беларусы перапынілі гэтую гордую серыю дзякуючы дакладнаму ўдару Рніча, які перавёў гульню ў авертайм. А «Сэнт-Джонстан», які ў першым матчы перамог з лікам 1:0, да перапынку не рэалізаваў пару добрых момантаў. Агонія «святых» працягнулася ў серыі пенальці, а пасля фінальнага свістка адбыліся непрыемныя сцэны - гулец «Менска» Сяргей Сасноўскі быў выдалены за падколкі ў адрас гаспадароў, якія саступілі», - напісала выданне.