Ладуцька: Чаму швейцарцы не ядуць беларускі шакалад?

Мэр Менску распавёў пра беларускую прамысловасць і сваё стаўленне да выязной пошліны ў $100.

- Усё не проста ў нас зарабляецца, - распавёў Мікалай Ладуцька. - Сёння дзякуючы намаганням кіраўніцтва краіны, развіццю прамысловасці створаныя ўсе ўмовы. У тым ліку і інфармацыйныя. Паглядзіце, ёсць і дзяржаўныя сродкі масавай інфармацыі, і прыватныя. І кожны эканамічны складнік мае свайго спажыўца.

У «мэра» Менска спыталі, ці часта ён робіць куплі за мяжой і як ставіцца да ўвядзення пошліны, піша «Комсомольская правда в Беларуси».

- Я ў 2009 годзе быў у Берне, у Швейцарыі. Там былі гасцініцы, арэна і побач - гандлёвы цэнтр. Я пайшоў у гэты цэнтр. Не хлопчык жа, дарослы мужчына, які разумее жыццё і да гэтага шмат чаго бачыў. Звярнуў увагу, што кавы там 3 – 4 слоікі, гарбаты стаяла 2 слоікі. І паглядзіце, колькі стаіць у нас.

Таксама Ладуцька паскардзіўся на тое, што беларускія тавары складана прадаваць у Еўропе. Там і абмежавальныя пошліны, і абавязковае атрыманне сертыфіката якасці. Пры гэтым, як падкрэсліў «мэр», у беларускіх крамах купіць швейцарскі шакалад можна, а ў швейцарскіх крамах наш шакалад не прадаюць. Яшчэ ён пахваліў беларускую прамысловасць.

- Сёння «Марко» пачаў выпускаць абутак класа прэміум, дзе скура мякчэй. Кошт больш высокі, яны каштуюць дзесьці мільён рублёў пара. Я кажу пра мужчынскі абутак. А можна купіць і за 300 тысяч рублёў.

Што тычыцца выезду за мяжу і ўвядзення мытнай пошліны ў памеры 100 даляраў, Мікалай Ладуцька сказаў, што гэта вельмі складанае пытанне.

«Падатак - гэта таксама ж прадыктавана інтарэсамі большасці. Не ўсе з'язджаюць кудысьці... Таму гэта не з'яўляецца ўшчамленнем. Калі гэта будзе, гэта не будзе з'яўляцца ўшчамленнем мільёнаў грамадзян. А гэта будзе дадатковы падатак на грамадскі транспарт, я б так сказаў. У нас самы танны грамадскі транспарт, калі браць на ўсёй тэрыторыі ад Далёкага Усходу да Францыі... Але рашэння няма, пакуль рана казаць так, не так. Але як прапанова да народу гэта прагучала», - заявіў ён.