Мытнікі канфіскавалі ў расейца швейцарскія гадзіннікі

10 верасня жыхар Калінінграда ехаў на аўтамабілі «Фольксваген Транспарцёр» у Маскву праз мытны пост «Каменны Лог».

Падчас апытання кіроўца заявіў пра адсутнасць тавараў, якія падлягаюць дэклараванню, перадае БелТА.

Пры правядзенні мытнага агляду транспартнага сродку ў салоне на падлозе каля пярэдняга пасажырскага сядзення была выяўленая скрынка, у якой знаходзіліся трое наручных гадзіннікаў маркі «Graham Mansory» з асабістымі нумарамі і сертыфікатамі.

Супрацоўнікі Ашмянскай мытні ўстанавілі, што дадзеныя гадзіннікі вытворчасці Швейцарыі выпушчаныя гадзіннікавым брэндам «Graham London» сумесна з нямецкай аўтацюнінгавай кампаніяй «Mansory» абмежаваным тыражом у 50 экземпляраў. Кошт адных гадзіннікаў складае 12 700 даляраў ЗША.

У адпаведнасці з заканадаўствам незадэклараваны тавар, ацэнены ў 337 500 000 рублёў, канфіскаваны. Па дадзеным факце супрацоўнікамі мытні пачаты адміністрацыйны працэс.