12-гадовы футбаліст з Беларусі зрабіў выбар паміж «Рэалам Мадрыдам» і «Барселонай»

Стала вядома аб упартай барацьбе клубаў за адоранага беларуса.

12-гадовы футбаліст з Беларусі Аляксей Маёраў, які зараз абараняе колеры моладзевага складу «Серданьёлы», неўзабаве будзе выступаць за мадрыдскі «Рэал».

Пра гэта расказала папулярнае спартыўнае медыя Гішпаніі Marca.

Як піша гішпанскае выданне, «Барселона» доўга спрабавала пераканаць малады талент, што яго лёс - гуляць за іх. Для гэтага клуб нават запрасіў хлопца паглядзець матч існага сезона на свой хатні стадыён у VIP-ложу.

«Але і сам хлопчык, і яго асяроддзе ўпэўненыя, што яго будучыня - за мадрыдскім «Рэалам», - піша Marca.com.

Цяпер мадрыдскі клуб рэгулюе пытанні з дакументамі Аляксея Маёрава. Пасля гэтага юны беларус пераедзе ў Мадрыд.

У студзені трэнер у прыватнай менскай акадэміі «Арсенал» Мікалай Рындзюк заяўляў, што «Рэал» плануе купіць беларускага футбаліста за 120 тысяч еўраў.