Пенсіянерцы пагражалі суткамі за спробу сустрэцца з Лукашэнкам

Чыноўнікі абяцалі прыцягнуць жыхарку Бабруйска да адміністрацыйнай адказнасці за тое, што яна нібыта перашкаджае ім працаваць.

Пра гэта сайту charter97.org паведаміла актывістка грамадзянскай ініцыятывы супраць беззаконня ў судах Валянціна Каваленка.

«Мы з мужам падалі заяўку на пікет пад лозунгам: «Дэпутат Мішур не абараняе правы і інтарэсы народа, а дагаждае чынавенству». Справа ў тым, што мы ўжо 10 гадоў дамагаемся перагляду крымінальнай справы нашага сына. З-за таго, што мы адстойваем сваю пазіцыю, мой муж адседзеў тры гады і два месяцы, але быў рэабілітаваны», - адзначыла жанчына.

Яна дадала, што неаднаразова звярталася па дапамогу да дэпутатаў мясцовага ўзроўню.

«Я тры разы прыходзіла на прыём да дэпутата Жаны Мішур, але яна не адказвала на мае пытанні. Мне ўжо два разы выносілі папярэджанне з-за таго, што я спрабую сустрэцца з чыноўнікамі і Лукашэнкам, але сёння я, усё роўна, паеду ў яго адміністрацыю. Мне сказалі, што калі я буду «перашкаджаць працаваць чыноўнікам», то мяне пакуль што прыцягнуць да адміністрацыйнай адказнасці: да штрафу ці сутак. Але на маё пытанне, што я парушаю, калі прыязджаю ў дзень прыёму грамадзян, улады адмоўчваюцца», - сказала Валянціна Каваленка.

Нагадаем, у ліпені ў Бабруйску ў актывістаў грамадзянскай ініцыятывы супраць беззаконня ў судах і пракуратуры прайшоў ператрус.