Беларусы змятаюць тэхніку ў польскіх гіпермаркетах

Перспектыва пошліны ў «100 даляраў з носа» выклікала ажыятаж на мяжы.

22 верасня чарга з легкавых аўтамабіляў на ўезд у Беларусь у польскай Кузніцы расцягнулася да канца вёскі. Што тычыцца паліц беластоцкага Media Market, то да вечара яны ўжо пустуюць. А чарга з легкавых аўтамабіляў на мяжы ў Польшчы расцягваецца амаль на паўтара кіламетра ў будні дзень, піша «Вечерний Гродно».

Журналісты выдання з'ездзілі ў Беласток і назад і распавялі пра свае прыгоды.

Уезд

Дзяўчына са страхавой кампаніі каля памежнага пераходу «Брузгі» распавяла па тэлефоне, што чаргі з легкавікоў на мяжы амаль няма. Гэта было ў 5.50 раніцы ў чацвер. Журналісты адправіліся ў Беласток у 6.05. За гэты час машын значна дадалося, і ў Польшчу атрымалася заехаць толькі праз 4 гадзіны. Пры гэтым аўтамабілі ішлі досыць хутка.

Па Беластоку яны перасоўваліся амаль па маршруце шоп-тураў: Кальварыйскі рынак, «Альфа», «Галерэя Бяла». На рынак прыехалі позна, таму ні людзей, ні прадаўцоў амаль не было.

Шпацыр не адкрыў нічога новага: на вуліцы і ў кожным буціку можна было сустрэць рускамоўнага пакупніка, убачыць аб'яву аб вяртанні TaxFree і кучу машын з беларускімі нумарамі.

У Media Market чакаў першы сюрпрыз. Журналісты прыехалі туды каля 16.00. Адзначаныя на лістку паперы патрэбныя мадэлі духавой шафы і варачнай паверхні, якія ў сераду на сайце крамы былі «ў наяўнасці» і нават без пазнакі «тавар сканчаецца», былі ўжо распрададзеныя. Прадавец Марэк патлумачыў, што тавар раскупілі яшчэ ў 10 раніцы, як толькі адкрыўся магазін.

«Прададзена, прададзена, прададзена», - такія надпісы былі ў выставачных экземпляраў варачных панэляў. У асартыменце заставаліся толькі даволі дарагія мадэлі. У выніку сума куплі ўсё ж такі выйшла з ліміту 350 злотых.

Набыццё пыласоса таксама выклікала складанасць: патрэбная мадэль засталася толькі на вітрыне і без спецыяльных мяшкоў. Сітуацыя відавочна нагадала лета 2011 года, калі беларусы змяталі з паліц Media Market усю тэхніку, такім чынам укладваючы грошы, якія абясцэніваліся.

Выезд

Другім сюрпрызам апынуўся затор на ўезд у Беларусь. Чарга з легкавых машын расцягнулася прыкладна на паўтара кіламетры ад польскіх памежнікаў.

Журналісты ўжо было змірыліся з доляй вярнуцца дадому да раніцы, як раптам да іх падышлі дзве палячкі і прапанавалі купіць месца ў першым запуску машын на тэрыторыю памежнага пераходу. Жанчыны запыталі 100 злотых. Пра тое, што на мяжы прадаюць месцы ў чарзе, чулі і раней, аднак яшчэ вясной такая паслуга каштавала 10 даляраў. Схема працуе так: у чарзе стаяць двое знаёмых змоўшчыкаў і ўпускаюць паміж сабой трэцюю машыну. Усё гэта здалося сумніўным, аднак калегіяльна ўсё ж такі вырашылі, што трэба пагаджацца, але збіваць кошт, - сышліся на 30 далярах.

Праязджаючы міма бясконцай «каляіны», журналісты не маглі да канца зразумець, як атрымаецца ў яе ўціснуцца. Адна з «прадпрымальніц» сказала прыпаркавацца каля крамы «Блізкі» і чакаць яе указанняў.

Праз пару хвілін усе машыны запалілі габарыты, падрыхтаваўшыся ехаць. Тут жанчына нам махнула рукой, стоячы тварам да чаргі. Мы яшчэ не паспелі зразумець сітуацыю да канца, як машыны рэзка крануліся, як баліды ў «Формуле-1». Аказалася, што частка аўтамабіляў урываецца з левага боку, дзе паварот налева забаронены. У гэты час стаяў гул: многія пачалі сігналіць, пратэстуючы няпрошаным шчасліўчыкам. У гэтай мітусні мы ніяк не маглі ўклініцца ў паток. Але прапусціўшы каля 10 аўтамабіляў, неяк упісаліся. Жанчына паабяцала, што прэтэнзій не будзе, і развіталася.

Чарга расцягнулася на ўсю Кузніцу

Чарга з легкавых аўтамабіляў на ўезд у Беларусь на памежным пераходзе «Брузгі» расцягнулася да польскай вёскі Кузніца і выйшла за яе межы ў нядзелю, 22 верасня. Пра гэта распавёў відавочца Эдуард. Па словах мужчыны, каб захаваць парадак на мяжы, паток рэгулявалі польскія паліцэйскія. Яны таксама сачылі, каб ніхто з кіроўцаў не праехаў у абыход «каляіны».