Беларусы будуць плаціць за кватэру ў два разы больш

Мінэканомікі папярэджвае пра рост квартплаты.

Калі зараз у сярэднестатыстычнага жыхара Беларусі на яе сыходзіць 7-8 адсоткаў ад сярэдняга спажывецкага кошыка, то ў бліжэйшы час гэтая сума павялічыцца да 15 адсоткаў. Пра гэта паведаміў міністр эканомікі Мікалай Снапкоў падчас прамой лініі з чытачамі газеты «Рэспубліка».

«У гэтым годзе мы ўжо павысілі кошты на жыллёва-камунальныя паслугі на 19%. Без уліку інфляцыі гэты працэс будзе ажыццяўляцца і далей. Але паступова і, як вы слушна заўважылі, зыходзячы з росту даходаў насельніцтва», - сказаў ён.

Міністр эканомікі адзначыў, што ў дачыненні да жыллёва-камунальных паслуг пачалі ўжываць і іншыя інструменты, якія носяць рэгулятыўную функцыю. У прыватнасці, ён нагадаў пра так званыя дыферэнцыраваныя тарыфы. Мікалай Снапкоў паабяцаў, што рост коштаў не будзе рэзкім.

«Павышэнне будзе плыўным, але мэтанакіраваным з пункту гледжання таго, каб плацяжы па камунальных паслугах у сярэднім спажывецкім кошыку складалі не 7-8% , а набліжаліся да больш справядлівага ўзроўню. Мы на дадзены момант лічым, што парог гэтага ўзроўню - 15%», - сказаў ён.

Падчас прамой лініі міністр «парадаваў» чытачоў і іншымі планамі свайго ведамства. У прыватнасці, ён паведаміў пра тое, што кошты на хлеб і шэраг іншых прадуктаў больш не будуць рэгулявацца дзяржавай.